E edificio monumental di Bestuurskantoor lo wordo restaura e proximo lunanan y esaki lo finalisa na luna di november.
Bestuurskantoor ta un monumento proteha y p’esey Monumentenbureau ta encarga cu restauracion di e parti monumental y DOW ta encarga cu e parti di paden, entre otro e parti di airco, electricidad y particion di oficina nan.
“E edificio a wordo construi na 1943 -1944 y ta inscribi den e registro di monumentonan”, directora di Monumentenbureau, Yvonne Webb a laga sa na Bon Dia Aruba. Sra. Webb a splica cu ‘te ainda nan ta buscando e color di verf original di e edificio, esta e color geel cla’. E trabounan ta cuminsa riba e parti pafo di e edificio, entre otro e fachada. “No ta henter e edificio ta bay wordo restaura na e momentonan aki”, segun sra. Webb. Na prome luga lo bay concentra na e parti di entrada cu ta bay wordo restaura e parti pafo y paden y e resto ta bay wordo haci den fase. “Tin hopi trabou pa haci pasobra e edificio tabatin waya di coriente cu ta hopi bieu y mester wordo cambia.” Monumentenbureau ta encarga pa traha e plannan pa restauracion di e edificio, y tambe ta percura cu pa loke ta e parti pafo keda den su estado original.
DOW lo traha riba e parti paden y ta encera instalacionnan di coriente y tambe e murayanan di paden. Mester percura cu e edificio ta mantene su status di monumento y pa cual Monumentenfonds ta revisa tur trabou cu wordo haci. Na mesun momento tin un otro proyecto andando cu ta na banda drechi y cu ta conecta cu Bestuurskantoor y parlamento. E parti aki no ta cay bou di e categoria monumental.
Pa e proyecto aki a tene un destaho caba cu a wordo gana pa un contratista local. E parti destaho Monumentenbureau no ta encarga cu esaki, pero ta duna conseho con nan tin cu conecta cu e parti monumental, esta kico ta wordo permiti y kico no.
