Dialuna ultimo minister di cultura, Xiomara Ruiz-Maduro (MEP) a realisa un bishita di trabou na Monumenten Bureau (MB) cu ta resorta den su ministerio. Asina e mandatario a cera conoci cu e personal di e oficina aki, y tambe el a haya un bista general di nan plannan y proyectonan.
Directora di MB, Yvonne Kock a declara na Bon Dia Aruba cu nan a delibera riba diferente topico. Tambe nan a probecha pa entreg’e un rapport di e investigacion cu a wordo haci pa un studiante di Hulanda riba cas floria y cas decora na Aruba. E mandatario a keda impresiona positivamente pa e trabou cu nan ta bin realisando pa documenta nan informacion. Minister Ruiz-Maduro a expresa su aprecio pa nos monumentonan y casnan historico.
E studio aki lo ta disponibel na Biblioteca Nacional Aruba (BNA) pa e ta accesibel pa tur mucha di scol. Tambe MB a traha un foyeto full na color y tur informacion lo ta riba nan Facebook page tambe. Pa otro aña nan tin plania pa bishita tur scol y comparti informacion a base di tur investigacion cu nan tin acumula. Actualmente nan ta bezig riba kico ta un monumento y riba nos cas di cunucu. E siguiente les lo ta esun di cas floria.
MB ta percura pa informacion cu t’ey fo entre otro riba nos monumentonan y estilo di construccion no bay perdi. Nan ta percura pa nan keda documenta, ya cu nos hendenan tin conocemento di acontecimento aki, pero tin biaha nan no ta mucho bon pa skirbi nan. P’esey hopi biaha MB mester di ayudo pa hende tambe yuda nan documenta tur esakinan.
Nan tin otro studio cu nan a informa e mandatario di dje y cu e ta dispuesto pa MB publica esaki. Ta un estudio cu a wordo haci di e achteco cu ta algo unico na Aruba. Sra. Webb-Kock a bisa cu di e seis islanan den reino Hulandes, nos isla ta mas rico den estilo di arkitectura aki. Nan a haci e estudio aki den e area di San Nicolas.
