Un monolito similar na esnan haya na Merca y Romania den simannan recien a aparece na un area no habita di Friesland.
E pilar di metal den reserva natural di Kiekenberg cerca di Oudehorne a ser mira pa prome biaha pa personanan canando diadomingo mainta. Esaki no ta briyante manera e obhetonan na Utah, California y Piatra Neamt na Romania, pero fuera di esey e ta parce hopi.
Omrop Frysland a reporta cu no tin rastro di ningun footprint rond di e base di e structura ni ningun otro pista riba con el a yega eynan. “Mi a cana cerca dje pero no tabatin nada pa mira cerca di e monolito”, caminante Thijs de Jong a bisa. “Tabata comosifuera el a cay for di ariba. Mester a tuma sikiera dos hende pa carg’e.”
De Jong a bisa cu e tabata skeptico tocante declaracionnan cu e obheto a ser poni como un chansa pa organisadornan di eventonan di fin di aña. “Aki na Oudehorne nos no tin un team di Aña Nobo”, el a bisa. “Mi ta kere mas probablemente ta un colectivo di artista. Pero no tin nomber riba dje. Mi a tende cu [diadomingo] a retira e obheto.”
E dos obheto na Merca a ser kita algun dia despues cu nan a aparece. E prome, cerca di parke nacional Canyonlands den desierto di Utah, a ser desmantela pa un grupo di cuatro homber dies dia despues cu el a ser haya.
E monolito na California, cual tabata den cumbre di Pine Mountain, Atascadero, a ser reemplasa pa un cruz di plywood poni pa un grupo di homber jong den paña di camuflahe y bril di vision nocturno, kende a transmiti video di nan mes kitando e structura mientras tabata grita ‘Cristo ta Rey!’ y canta canticanan country.
E monolito na Romania, den un luga remoto cerca di e fuerte antiguo di Dacian, a disparce ‘keto’ cuatro dia despues cu el a aparece dia 26 di november. Diadomingo mainta, a reporta otro monolito na un beach na Isle of Wight na Reino Uni.
A yama e obhetonan monolito pasobra nan structura ta similar na esunnan cu ta aparece den peligula di Stanley Kubric, 2001, unda nan ta compaña etapanan crucial den evolucion di ser humano.
