Monitornan instala na WEB y ASTEC pa controla calidad di aire

Siman pasa ATIA a organisa un reunion entre representantenan di ASTEC, WEB, APA y e liñanan di transporte maritimo pa ricibi un update y discuti riba e problemanan cu e huma, entre otro, cu WEB a bin ta causando pa mas cu un aña caba.

Mirando e efecto negativo y consecuencianan pa comercio, cada bes cu e trahadonan mester para nan trabou pa via cu e huma ta afecta nan, ATIA a dicidi di intermedia y trece e companianan envolvi na mesa pa asina purba yega na e causa di e problema y na solucionnan sostenibel pa tur partido.

For di 2018 e proceso aki a cuminsa, y aunke e problema no ta completamente soluciona ainda, por bisa cu ASTEC, WEB y APA ainda ta trahando pa yega na un waf cu por brinda un servicio confiabel, consistente y eficiente.

Algun di e pasonan cu a wordo tuma pa WEB por trece alivio den e situacion ta, entre otro, e cambio pa un fuel oil cu ta contene un porcentahe mas abou di sulfur, e uzo di diesel na luga di gasolin pa cende y paga e motornan, y “root blast” necesario diariamente cu awor ta wordo haci prome cu 6or di mainta y despues di 6or di atardi. Ademas, WEB a cumpra 6 motor nobo cu lo yega y wordo instala na mei 2020, cu ta garantisa 25% menos di emision.

Varios monitor a wordo instala riba e tereno di WEB y tambe na ASTEC pa controla e calidad di aire. ASTEC y WEB ta trahando riba un protocol segun normanan Europeo pa cu calidad di aire y cu lo claramente stipula ki ora ta safe pa traha y ki ora ta hustifica pa un paro di trabou tuma luga.

Un punto importante cu e representantenan di e companianan di transporte maritimo a trece dilanti ta, cu ta importante pa gobierno bin cu leynan y normanan pa calidad di aire pa cualkier compania cu ta of cu kier establece su mes den e area industrial di Barcadera, pa asina evita problemanan cu esaki ta causa pa e trahadonan di no solamente waf, pero tambe e barconan y otro companianan den area.

E proceso di yega na soluciona e problema aki, tawata un reto grandi, pero ATIA ta contento di por a trece e partidonan concerni hunto pa dialoga y purba di yega na solucionnan concreto. Aunke ainda no a yega caminda mester ta, ta importante cu tur esfuerso ta enfoca riba e mesun obhetivo.