Monica Pimentel ta un hoben di 32 aña di edad, cu desde un edad jong ta practica e deporte di taekwondo. Na 2016, Monica tabata tin e honor di por a representa Aruba na Olimpiada di Rio de Janeiro, y den un combersacion cu Bon Dia Aruba e ta conta di su experiencia, su preparacion pa e Olimpiada y e ta enfatisa e importancia di practica cualkier tipo di actividad pa hobennan den actualidad.

Monica a cuminsa train taekwondo cu 9 aña di edad bao di guia di Grand Master Chaco Cornelio. Su mayornan a inscribie den taekwondo pa e siña defensa personal como mucha muhe. E tabata practica otro tipo di deporte tambe, pero el a sinti un conexion mas fuerte cu taekwondo y e ta splica con e deporte a yud’e den diferente aspecto den bida.

“Mi ta kere deporte en general ta duna bo un responsabilidad na un edad jong, manera por ehempel e disciplina pa ta na ora. Tambe bo ta siña push bo mes y ora bo bringa of haci un deporte, bo mester expone bo mes y esey ta duna bo confiansa tambe”, el a bisa.

 

Na aña 2016 Monica a representa Aruba na e Olimpiada na Rio de Janeiro, Brazil. E ta conta cu desde chikito semper e tabata hopi competitivo y semper e tabata wak Olimpiadanan na television, y esey semper a keda den su mente. Te na e momento cu el a dicidi di compromete su mes pa train pa yega na e Olimpiadanan. “E momento unda cu mi mester a kies pa tum’e mas na serio a yega y esey tabata e momento cu, na 2012, 2013, mi a bay biba na Korea pa tres aña pa mi bay train full time afo.”

“Mi mester a custuma. Mi no tabatin e volumen ni intensidad ainda. Ora mi a drenta e la costa mi hopi y mi echt mester a pusha mi mes pa mi por yega unda mi por a bisa, ‘ok mi ta pareu cu e grupo’. Obviamente e no ta algo di un of dos dia, e ta algo cu bo mester ta hopi consistente, y manera mi a bisa, e parti di pusha bo mes ta hopi importante,” el a conta.

Monica ta splica cu un clasificatorio Olimpico den cualkier deporte ta dificil pa logra, hasta paisnan grandi tin biaha no por alcansa esaki. Y mirando cu Aruba ta un pais hopi chikito, e ta splica cu tin diferente factor cu ta haci cu Aruba no tur ora ta clasifica pa un Olimpiada den e deporte di taekwondo.

“Si bo compara cu Mexico cu tin muchanan cu ta bay competi afo, cu ta bin di un sistema cu nan ta bin di un scol chikito anto nan ta crece bay te na un nivel halto. Por ehempel un mucha cu a cuminsa train cu 7 aña pa ora e tin 12 aña e tin hopi mas competencia di experiencia compara cu akinan. Esey ta un di e factornan cual ta haci mas dificil, ora bo ta na un pais chikito, bo desaroyo den e deporte”, el a splica.

“Y paisnan mas grandi tin miho infrastructura, miho sistema y den tur manera e recompensanan ta diferente. Por ehempel na Mexico, si un mucha gana un competencia nacional nan ta haya un beca escolar unda nan ta cubri nan estudio. Of por ehempel na Colombia tambe, si nan gana un competencia Centro Americano, pa e resto di nan bida nan ta haya un salario. Y na Aruba nos no ta asina leu ainda”, el a agrega.

Monica a habri e fundacion Impact Taekwondo Aruba y e mision di e fundacion ta pa motiva mucha, hoben y adulto pa practica actividadnan deportivo y aplica e principionan di taekwondo. Durante e pandemia tabata un periodo hopi dificil, Monica ta conta, y e ta sigura cu nan ta sigui traha pa e scol sigui crece. “E ta un deporte bunita e ta un deporte cu hopi mayor ta gusta paso e ta duna e muchanan disciplina, dus nos ta keda traha duro cu e scol”, el a bisa.

Monica ta splica cu el a tuma e decision cuminsa cu e fundacion Impact Taekwondo Aruba pa e parti di duna back na comunidad. “Mi ta hopi agradecido di a representa Aruba den un Olimpiada, no solamente Aruba, pero e deporte di taekwondo. Mi ta sinti cu e ta mi rol tambe y responsabilidad pa mi sigui cu pasonan.”

Por ultimo Monica ta enfatisa e importancia pa practica deporte den actualidad. E ta bisa cu no ta importante pa solamente hende hoben compronde e importancia di un actividad deportivo, pero tambe ta importante pa e mayornan compronde con importante haci deporte ta den e bida di un hoben. “Practica un deporte of cualkier cos cu ta involucra movecion, actividad den grupo, musica, un actividad extra, semper ta trece algo positivo den un e bida di un hoben.”

“Mirando aworaki e circunstancianan cu COVID-19, bo ta mira hopi hende tin problema cu salud mental, y mi ta kere cu haci un deporte of practica un actividad, fuera di djis bay scol y bay cas, ta keda algo importante pa e salud fisico y mental di un hoben”, el a finalisa.