(CuraçaoChronicle) – Centrale Bank van Curaçao en Sint Maarten lo emiti un moneda silver di 5 florin conmemorativo honrando e ciudad di Willemstad y marcando su di 25 aniversario como un sitio di Herencia Mundial.
E area Historico di Willemstad tin riba UNESCO su World Heritage List desde aña 1997, cual ta un motibo suficiente pa honra Corsou su capital cu un moneda conmemorativo den aña 2023. Willemstad ta un di e poco ciudadnan den e lista cu a ser otorga e status special aki pa causa di su cultura universal y su balor historico. Willemstad ta caracterisa pa su barionan historico, diversidad cultural, arkitectura urbano unico y mas di 700 monumento multicolor. E ciudad tambe ta unico como un waf historico Caribense.
E moneda conmemorativo lo ser produci pa Royal Dutch Mint. Su diseño ta paralelo na esun di e moneda conmemorativo Hulandes. Mirando cu e moneda lo celebra Corsou su sitio importante, un yamado publico a ser haci na diseñadornan y artistanan den Corsou pa diseña ambos e moneda den Euro y NAf. E diseño cu a resulta gañado ta esun di e artista Curasoleño Cleo Maxime de Brabander.
Di un banda ta mustra Rey Willem Alexander cu e brug Reina Juliana su tras. 4 strea ariba di dje ta simbolisa e 4 paisnan cu ta crea e Reino Hulandes, pues Corsou, Aruba, Sint Maarten y Hulanda. Di e otro banda por mira e ciudad cu e 4 barionan cu ta crea e sitio cu ta herencia mundial di UNESCO pues Punda, Otrobanda, Scharloo y Pietermaai. E diseño tambe ta ilustra monumentonan clave manera Handelskade, Mikve Israel-Emanual su sinagoga na Punda, Fort Amsterdam y Emanu-el temple, cual ta marca e frontera di e bario Pietermaai.
E moneda aki ta ser crea cu e calidad mas halto di silver y ta bini den un caha di presentacion ademas di un certificado di autenticidad. E lo ser limita na 500 piesa. Willemstad su moneda tambe lo ta legal pa uso na Corsou y Sint Maarten cu e balor nominal di 5 florin. Esaki lo tau n di e ultimo monedanan conmemorativo cu lo ser emiti den e moneda actual di e pais, pues e Netherlands Antilles Guilder.
