Den fin di siman Santa Rosa Aruba hunto cu Living Soil Aruba, organisacionnan cu ta lidera e proyecto di agroforesteria sintropico, tabata na Mon Plaisir Basisschool pa duna inicio na e proyecto aki y cuminsa cu e hardin di alimentacion na e scol aki.
Mon Plaisir Basisschool ta bira e di cinco scol cu ta ricibi nan hardin di alimentacion riba tereno di scol. Un grupo grandi di boluntario, famia, docente, alumno y ex-alumno a contribui na e preparacion di e tera pa asina e proceso di crecemento di simianan cu a ser planta por cuminsa pa pronto e scol por cuminsa cosecha nan fruta- y berduranan.
Un total di 13 scol basico ta participa den e proyecto di agroforesteria sintropico. E scolnan basico cu ta bay ta participando den e proyecto di agroforesteria sintropico ta Scol Basico Washington, Scol Primario Kudawehca, Colegio Hilario Angela, Colegio Conrado Coronel, Pius X School, Scol Caiquetio, Sint Paulus School, Play2Whizz Campus, Scol Basico Dornasol, Scol Paso pa Futuro, Mon Plaisir School y Grof Van Zinzendorf.
IPA tambe ta participando den e proyecto pa e maestronan conoce e tecnica di agroforesteria y e importancia pa loke ta trata e sector primario. Di e forma aki conhuntamente cu e maestronan cu ta den preparacion pa guia e futuro generacion, nan tambe por yuda inculca e importancia di agricultura den e muchanan.
Na mei di 2022 Living Soil Aruba a realisa un di e prome proyectonan di agroforesteria na Prinses Amalia School. Minister Arends a bishita e proyecto y a expresa cu esey ta loke tur e scolnan basico na Aruba tin mester y aworaki e proyecto di agroforesteria sintropico na scolnan basico a bira realidad.
E proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
