Amienda aproba awor falta adaptacion di 12 ley ainda
Parlamento pro registracion di partner mesun sexo
Aunke den practico ainda ta falta cambionan di 12 ley pa duna e partnernan registra e mesun derechonan civil cu personanan casa, e aprobacion ayera di e amienda 7 tabata algo historico pa Aruba: prome pais den Caribe cu ta reconoce e registracion aki. Y cu partnernan di mesun sexo tambe ta haya mesun derechonan.
Click aki pa haya e amienda 7 completo
Pues ayera por a mira un paso mas den direccion di mas igualdad pa parehanan di mesun sexo. Desde 2007 nan por registra nan matrimonio na Censo aki, sinembargo te ainda nan no por casa na Aruba mes. Locual cu ta cambia awor ta cu nan por registra nan union na Censo. Pa esaki lo bin un registracion apart na Censo unda partnernan hetro- y homosexual por registra.
Esaki ta importante pasobra asina nan por haya mesun derechonan cu parehanan casa, cu ta importante pa pensioen y otro derechonan civil. Den practica esaki ainda no ta regla y ta falta cambio tambe di diferente ley manera menciona, por ehempel di SVB pa AOV etc.
AVP a entrega un mocion ayera pa purba acomoda e amienda y asina tur cos por keda regla mas lihe, prome fin di aña. Sinembargo 5 miembro di e fraccion berde y tambe e miembronan di MEP a vota contra e mocion aki y awor e proceso mester tuma su tempo normal y lo tuma mas tempo.
Debate dificil
Tabata un dia basta largo y seguramente hopi dificil pa hopi parlamentario, como 11 ora den parlamento pa ta exacto unda finalmente a vota riba e amiendanan cu a wordo presenta den e siguiente ronda di e reunion publico cu ta trata e Codigo Civil. Despues di un pauze 1or di merdia, parlamentarionan a keda delibera y kibra cabes pa mas cu 5 ora largo unda despues 9 amienda a wordo presenta hunto cu 1 nota di cambio.
Resultado di votacion
Amienda number cinco, presenta pa fraccion PDR riba proteccion di herederonan contra debe scondi a wordo aproba cu 18 voto na fabor. Amienda number seis di fraccion PDR riba topico pa simplifica financiamento di panel solar riba casnan y negoshi tambe a keda aproba cu 17 voto na fabor y 0 en contra. Esun di mas discuti entre otro y menciona ariba, amienda number 7 cual ta trata registracion di pareha den a keda aproba cu 11 voto na fabor y 5 contra.
Amienda pa fungi un instancia como punto central pa informacion wordo miho registra en cuanto abuso di mucha a keda aproba cu 16 voto na fabor y 0 contra. E proyecto di ley den su totalidad manera notifica den e nota di cambio a wordo unanimamente aproba.
E discusion a concentra riba igualdad
E tabata seguramente un dia basta largo di deliberacion pa asina purba yega na un acuerdo mirando cu a lo menos cinco miembro di fraccion AVP tabata contra sin tin un consenso den propio fraccion di AVP. Segun Lider di fraccion AVP, Rene Herdé tin un diversidad di opinion cu semper a respeta y no tur miembro di fraccion ta di acuerdo cual ta oke den un pais unda ta respeta, opinion, convincion y creencia di cada un. ”E tema di igualdad den nos pais no ta debatibel. Nos no por debati si nos ta reconoce un derecho of no. Den mi bista e tema cu nos ta tratando akinan y sigur e forma cu nos a formul’e y regl’e no ta toca aspecto religioso. Mi mes ta un persona creyente y activo anto mi consenshi ta trankilo pasobra mi ta scoge pa igualdad den nos comunidad bao di nos constitucion cu no ta permiti discriminacion den ningun forma. Tanten tin desigualdad den nos pais nos tur no por bay dilanti.”
Publico presente
Na dado momento parti merdia despues di e prome pauze, e audiencia a cuminsa canta e Himno di Bandera den forma di protesta pa motibo cu tabata tardando hopi pa sigui cu e reunion. Eynan entre otro por a scucha diferente discusion di e personanan religioso hunto cu apoyadonan di grupo LGBT, discutiendo sanamente riba nan diferencia di opinion pa purba di compronde y yega na otro.
Despues di e votacion di e amienda pa e registracion di partner, mayoria hende riba e tribuna publico ayera nochi a vocifera nan alegria. Riba Facebook tabatin felicitacionnan marca cu #Lovewins y #Equality. Pero tambe comentario di hende negativo cu no ta haya cu esaki ta bon pa Aruba. Despues di e votacion parlamentario Desiree Croes De Sousa, cu a inicia e amienda pa asina partner di mesun sexo por registra tambe, a bay Jimmy’s Place pa celebra e ‘victoria’ hunto cu un grupo grandi di sostenedo.
