Parlamento siman pasa, a trata ‘ontwerp landsverordening kinderopvang y olv van het begroting van het onderwijsfonds 2017.
Miembro di fraccion di AVP, sra Jennifer Arends-Reyes a mustra cu mundo a cambia y mayornan awendia ta mas participativo den e mercado laboral. Specialmente hendenan muhe ta mas participativo cu antes y pa e motibo aki tambe, calidad di cuido pa muchanan, a bira mas importante cu nunca.
“Ta un momento sin duda historico pa Aruba, caminda cu porfin despues di 55 aña cu e prome centro di cuido di mucha a establece su mes na Aruba cu ta Kinderverblijf Te Aworo, Aruba ta conoce un ley cu ta prescribi e rekisitonan basico pa por opera un centro cu ta cuida mucha.
Tratado internacional di derecho di mucha ta prescribi cu nos muchanan tin derecho riba proteccion, cuido y guia adecua. Awe nos por bisa cu Aruba ta un stap mas dilanti cu cumplimento di e tratado internacional aki na beneficio di nos muchanan. Nos lo ta cumpliendo tambe cu un di e recomendacionnan cu Unicef a enfatisa tambe den su rapport di 2012 pa cu pais Aruba.
Parlamento a cumpli cu e mocion cu mi persona a entrega na 2015 den nomber di fraccion di AVP cu a carga sosten unanime di e Parlamento aki, den cual a urgi Gobierno pa duna prioridad na e ley di crèche aki y nos a presenta un concepto pa Parlamento. Den pasado, pa ta mas specifico na aña 1998, a traha hopi riba e tema aki y no a logra trece un concepto cu a carga sosten di tur esunnan envolvi. E historia di Aruba su centro di cuido a conoce durante transcurso di tempo diferente cambio, desde e prome centro na aña 1962 pa comienso di añanan 70 cu diferente crèche a habri nan porta na cas di famia, despues den añanan 80 e prome speelschool cooperativa a habri su porta, cual tabata Kerekentenchi y na aña 1989 YMCA a cuminsa cu su programa di ‘opvang.’
Aña 1996 tabata un aña importante den historia di ‘kinderopvang’ caminda cu doñonan di trabou a cuminsa bira consciente di nan rol y e prome ‘bedrijfsopvang’ a keda estableci cu ta MetaCare y recientemente Traimerdia a cumpli 20 aña di existencia. Awendia nos por bisa cu Aruba ta conta cu mas cu 130 pa 140 crèche cu ta registra, un Metacare cu a cambia di concepto pa motibo cu ta brinda un suma y e empleadonan mes por scoge cual crèche nan ta haya miho pa nan yiu of uno cu ta keda mas cerca di nan cas.
Tambe ta di elogia dos banco local y AZV cu a yuda nan empleadonan c’un contribucion pa ‘kinderopvang.’ Un centro di cuido di mucha tin su costo di operacion cun’e, y bishitando diferente crèche nos por a constata cu e preocupacion di mas grandi ta cu tin crèchenan por cumpli awe cu tur rekisito basico cu lo ta necesario pa opera un crèche y tin otro centronan cu ta ‘underground’ cu no tin bista riba nan, cu ta cobrando mayornan placa pa nan servicio y cu lo por ta formando un peliger pa bienestar di muchanan.
Esaki ta e meta principal di e concepto di ley aki, crea un sistema di ‘vergunning’ of permiso, rekisito y control pa cada centro di cuido di mucha.
Bida di nos muchanan mester pasa di ta di un negoshi pa un centro di cuido cu ta serio y cu por carga e responsabilidad di cuida di nos ciudadanonan di mas chikito y fragil, esta nos muchanan. Cada mayor sa cu nan yiunan ta nan tesoro y nan mester por bay trabou cu curason trankil cu nan ta laga nan yiu den man di personanan cu ta capacita y tin e curason y training necesario pa traha cu mucha. Nos sa cu ken pasado y no mucho tempo atras cu Aruba tabata conoce diferente casonan sumamente lamentabel y si e ley aki por yuda na preveni e tipo di incidentenan aki, lo ta algo cu nos por sinti bon di ta contribuyendo na e siguransa aki.
Cada caso lamentabel ta uno di mas riba nos isla y cu e ley aki di parti di nos fraccion y comision cu a sinta cu e lidernan di crèche, bishitando diferente crèche na Aruba, por bisa cu e ley aki lo mester por haci un diferencia positivo pa Aruba.
E ley aki ta un comienso, cu lo wordo introduci den fase.
No ta e intencion cu e costo di crèche subi y pa tal motibo a dicidi di pone termino di implementacion pa inversionnan den extra personal of un cura por ehempel si ta necesario.
E inversionnan aki ta importante, no por ta asina cu lo mester acepta e status quo y compromete e calidad y siguridad di nos muchanan. Tin biaha ta dificil pa compara Aruba cu otro pais, pero Aruba tin e porcentahe mas halto di mucha pa ‘begeleider,’ caminda tin mucho mucha pa un ‘begeleider’ wak pa nan.
Esaki ta un risico cu nos lo mester baha pero si teniendo na cuenta cu e situacion di Aruba.
E diferencia di prijs lo keda y mester keda existi den mi concepto, ta netamente e variedad di servicio ta locual ta importante pa tin. No ta tur situacion di mayor ta mescos y locual ta traha pa un, no necesariamente ta traha pa e otro. Pa tal motibo e rol di mayor ta keda central den vigila ki centro di cuido lo ta miho pa nan situacion y si nan ta ricibiendo e servicio cu nan a wordo priminti y si nan ta contento cu esaki.
Un punto cu ta importante pa keda subraya cu un centro di cuido di mucha mester keda un speelschool. Mucha mester hunga, fuera di cu e ta bon pa nan desaroyo e ta cientificamente comproba cu hende grandi cu no a hunga tempo nan tabata chikito, ta mas inclina den bay den criminalidad. Muchanan den e edad di 0 pa 3 mester haci actividadnan y mester hunga y specificamente 3-plussers manera nan ta yama nan, mester cuminsa siña na un manera ‘spelenderwijs’ y prepara nan mes pa e programa cu kleuter lo tin pa nan, pues lo mester por enfoca riba e ‘voorkennis’ y preparacion di e grupo di 3-plussers.
E ley aki ta brinda un era nobo den cuido pa nos muchanan, e lo trece mas trankilidad pa mayornan cu ta haci uzo di e facilidadnan aki, pa asina nan cumpli cu nan deber laboral diariamente y ta sigura cu e cuido lo keda riba un nivel halto cu tur mayor ta desea pa nan yiu tin durante di nan estadia den un crèche,” Parlamentario Jennifer Arends Reyes a trece dilanti durante di e reunion publico caminda e ley di crèche a wordo aproba den forma unanime.
