(Caribisch Netwerk) – Na Corsou y Sint Maarten a intercambia e moneda nobo pa prome biaha: e florin Caribense. Meymey di hopi interes, Minister di Finanzas di Corsou Javier Silvania (MFK) a intercambia e biyetenan bieu pa esnan nobo dialuna mainta na Banco Central di Corsou y Sint Maarten (CBCS). Su homologo Marinka Gumbs (Finanzas, DP) a haci esaki na mes momento na Sint Maarten.

Despues di añanan di preparacion, e ta oficial for di 1 di april: e florin Caribense ta den circulacion na Corsou y Sint Maarten. Un moneda nobo, cu biyetenan colorido cu ta mustra bestianan bou di awa, di un stingray pa un cabay di lama. E ultimo ta specialmente popular. “Mi ta kere cu e cabay di lama ta esun di mas bunita,” un señora a bisa. “Pero mi no ta bay mira esey hopi biaha.” E ta para riba e biyete di 200 florin Caribense, e suma di mas halto.

E florin Caribense nobo ta reemplasa e florin Antiano y tin e mesun balor. Entre 31 di maart y 1 di april a transfeir transaccionnan di pago digital for di Naf pa CG, cu tin e codigo internacional XCG. Tur dos moneda por ser usa ainda den ambos pais pa e proximo tres lunanan. Despues, e Naf ta ser despedi oficialmente.

Biyetenan falsifica

E florin Antiano a ser introduci 73 aña pasa. Pero e notanan ta anticua y ta facil pa imita. Den ambos pais tin hopi biyete di 100 florin falsifica. Naturalmente, e ta hunga un rol tambe cu Antias a ser disolvi na 2010 y e nomber awor ta anticua.

Segun director di CBCS di Corsou Leila Matroos-Lasten, introduccion di e florin Caribense ta un simbolo di confiansa ‘den nos economia y den nos mes’. Riba Sint Maarten, director di CBCS Richard Doornbosch a bisa cu e ta mira e introduccion como un paso ‘den un era nobo di stabilidad y crecemento financiero’.

Dollarisacion

No ta tur hende na Sint Maarten ta contento cu e moneda nobo. Hopi hende ta mira ‘Dollarisacion’ como e paso mas logico debi na e fluho grandi di turista Mericano y e hecho cu hopi producto tin prijs na dollar. E prome reaccion abou di e post di Facebook di parti di gobierno di Sint Maarten tocante e introduccion ta bisa hopi, esta cu e ta un ‘malgastamento di placa di e pagador di impuesto’.

E poblacion di Corsou ta mucho mas entusiasma. E prome intercambio a conta cu presencia di entre 100 y 200 persona y medionan di comunicacion. Un dama den un bisti colorido tabata para dilanti di un bancomatico na Corsou, cu mas su tras. Tabata mainta trempan, pero tur hende a lanta cu e mesun meta: pa tin e florin Caribense nobo pa prome biaha. “Mi a purba di lanta placa ayera caba,” e señora a bisa hariendo. “Pero pa e tempo ey e florinnan bieu tabata disponibel ainda. Awe ta e dia.”

E introduccion di e moneda colorido nobo a mira un proceso di seis aña largo, y segun e banco, e ta cumpli cu ‘tur e caracteristicanan di seguridad moderno’, Matroos-Lasten a enfatisa.

Mundo bou di awa

Otro factor cu ta hunga un rol ta cu e biyetenan nobo ta hopi atractivo y moderno. A usa imagennan di edificionan caracteristico y historico di ambos pais y hopi atencion a ser paga na e mundo abou di awa “cu ta conecta ambos pais, cu ta geograficamente 100 kilometer for di otro’, segun Matroos-Lasten.

Di awor padilanti e Naf por ser cambia pa e florin Caribense door di e doñonan di cuenta na banconan comercial. Personanan cu no tin cuenta di banco por tuma contacto cu CBCS pa cambia placa cash. No mester di identificacion pa un montante bou di 2.500 Naf.

Tiendanan ta acepta tur dos moneda, pero hopi biaha ta duna florin Antiano back. “Te ora tur biyete bieu caba,” un cahera a splica. “Despues nos ta cambia completamente.”Den e proximo trinta aña, ainda por cambia e monedanan y biyetenan bieu na Banco Central.

E banconan tabata prepara pa e ahustenan di pagonan ‘cashless’ for di comienso di e siman aki. Ta pa e motibo aki trafico digital no tabata posibel durante anochi di dialuna pa diamars y pagonan cu carchi di banco tambe por a causa dificultad. Pa informacion tocante e florin Caribense, por subi e website: www.caribbean-guilder.com.