Awor cu e embargo cu gobierno di Venezuela a impone riba Aruba a wordo oficialmente lanta, gobierno di Aruba ta kere cu di un forma mester para banda di e comerciantenan cu a percura di abastece nos comunidad cu fruta y berdura durante e crisis cu a dura cuater luna.
Aunke e parti di e fluho aereo di pasahero a keda reestableci, ainda e transporte maritimo bilateral no a wordo normalisa. Prome minister di Aruba, Evelyn Wever-Croes (MEP) a declara cu nan ta tene cuenta cu nos importadonan local, pasobra ‘con cu bay bin na e momento mas dificil nan a yuda nos’. E mandatario ta kere cu awor e momento a yega cu nos tin cu mustra lealtad bek.
El a recorda cu e frontera no ta full habri ainda, ya cu e prome barco for di Venezuela no a yega ainda. Gobierno di Aruba ta sperando un comision cu tin cu traha pa asina nos sa kico ta e documentacion cu Venezuela ta rekeri pa nos autoridadnan controla nan. Tanten cu no tin e combersacion aki, nos lo ta violando e acuerdo firma entre minister di relacion exterior di Reino y vice-presidente di Venezuela. Aruba absolutamente no kier viola e acuerdo aki y te ainda e barconan no mag di drenta.
Encuanto e echo cu Corsou si a habri su waf caba, e prome mandatario a bisa cu el a yega di tuma contacto cu autoridadnan di nos isla ruman y no ta haci cu nan operacion maritimo a normalisa. Si ta asina cu a yega no mas cu dos boto cu fruta y berdura, y otro material. Pero nan a wordo poni na haltura cu no tin palabracion ainda, y nan no por a drenta haci actividad comercial cu nan productonan, y nan a bay bek Venezuela.
El a declara cu tanto Aruba como Corsou ta para riba e mesun linea pa loke ta trata e reunion cu mester tuma luga den e comision bilateral prome, pa asina yega na palabracionnan y asina e barconan cu frutanan y berduranan di Venezuela por bin bek.
