Modernisa sector social: App, tv, y centronan di bario mas activo

Aruba ta conoce hopi fundacionnan & organisacionnan social, cada un dunando cierto servicio. Tambe nos tin nos centronan di bario cu poco poco ta organisa actividad social. Pero segun Shurman Milliard (trahado na Telefon pa Hubentud), ta tempo pa rebiba e sector social y e centronan.

E hoben Rubiano a muda 4 aña pasa di Eindhoven, Hulanda unda el a caba su estudio di trabao social cultural y a traha varios aña. Specialmente el a traha cu hoben (por mira riba e potretnan) unda e tabata rebiba centro di bario, asina logra di yuda hoben problematico y baha e molester den e barionan. Un di e peliger mas grandi, e ta conta, ta cu hoben ta pasa hopi tempo na cas nan so.

Esaki no ta pa falta di actividad pa hoben. Tin hopi organisacionnan manera esun deportivo unda hoben por bay. Tambe tin traimerdia of otro luganan cu ta mas enfoca riba ayudo cu huiswerk. Pero sr. Shurman a ripara cu tin basta hoben cu no ta interesa di bay na e luganan ey. 

E resultado ta cu e grupo di hoben ta cuminsa ‘hang out’ riba caya, unda e chens ta grandi cu nan ta bay causa molester pe otro habitantenan. Of pio, bay den un gang. “Locual falta mayoria biaha ta cu e hobennan no tin un luga pa topa unda no tin mucha regla. Un luga unda nan por dijs pasa tempo: papia, wak television, hunga riba computer. Porta nan kier hunga futbol, pero un rato so. Esey ta diferente ora bo ta join un club di futbol: eynan bo ta haya bo contactonan social tambe pero bo mester gusta hunga futbol.”

Otro concepto

Sr. Shurman a cuminsa traha na Hulanda cu un otro concepto y esaki a resulta exitoso. “Hopi biaha un centro (buurthuis) tin un solo tema. Pero si abo como hoben no ta gusta e tema ey, bo no ta bay eynan. Hunto cu otro nos a cuminsa cu un otro tipo di centro, unda e hobennan ta dicidi kico nan kier haci y nos a yuda nan desaroya nan talentonan.”

Na Aruba el a ripara cu pa hoben e ta hasta mas dificil pa topa cu otro pafo di scol. “Na Hulanda nan por core bais of bay riba scooter, esaki ta hopi dificil aki. Pero un centro di bario cerca di bo cas por fungi como un luga pa topa cu bo amigonan.”

Momento cu un centro den un cierto bario ta cuminsa atrae hoben, sr. Shurman ta bisa, bo por cuminsa organisa cierto actividad specifico hunto cu e hobennan, y asina desaroya nan talentonan. “Si bo ta duna nan e poder y responsabilidad pa organisa algo, mi sa di experiencia cu nan ta hopi motiva pa esaki bira algo exitoso. Por ehempel si un hoben ta bon den computer y otro ta ripara, bo ta stimula e hoben pa duna un curso. Pero bo no ta pone presion. Si nan kier bin pa hunga Playstadion so, tambe ta oke.”

Sinembargo su experiencia ta cu hoben ta interesa pa desaroyo nan mes momento cu nan ta sinti stimula y tin un ambiente positivo.

E trahado social ta enfatisa cu esey ta hopi importante, cu e hobennan finalmente ta haya un rol den e centronan di bario. Esaki bou guia di un trahado social y cu ayudo di stagiairnan. “Mi experiencia ta cu e no ta rekeri hopi personal pa opera un centro di bario. Di otro banda nos mester cuminsa realisa cu trabou social no ta pa semper. Si un centro di bario no tin un funcion mas, pasobra no tin hoben mas den e bario of tin otro proyecto mas efectivo, e trahado social mester comprende cu su trabou no ta necesario mas. Bo ta traha basicamente te ora e problema ta keda soluciona. Esey mi ta kere tambe ta un cambio di e mentalidad aki unda nos  ta kere cu nos trabou ta pa semper ”

App & TV

Banda di rebiba e 9 centro di bario na Aruba cu un concepto mas atractivo pa hoben, sr. Shurman tambe kier realisa un App pa informa comunidad en general riba desaroyo social. “Ainda hende no sa unda nan mester ta pa cierto informacion y ayudo social. Tin hopi fundacionnan social na Aruba pero e caminda pa yega na nan, aparentemente no ta conoci. E APP (un aplicacion cu bo por download riba bo cel y ta fungi manera un guia electronico) tambe ta stimula pa fundacionnan traha mas hunto. Pasobra nos tur ta traha mucho for di un isla.”

E App por ehempel lo contene un mapa di Aruba unda bo por mira tur e organisacionnan social. Bo por busca facilmente riba tema of malesa y haya tur e organisacionnan ofreciendo informacion y of ayudo. Y e organisacionnan tin e oportunidad pa publica informacion actual por ehempel actividad pa recauda fondo of presentacionnan. “Awe tin asina hopi informacion electronico pero fragmenta. Cu e App bo ta duna hende un luga pa nan por bay pa haya informacion.”

Banda di esaki sr. Shurman ta boga pa crea programa di television educativo. “No ta por nada cu programa manera Sesamstreet ta riba television pa mas cu 30 aña. E combinacion efectivo di television y educacion ta reconoce mundialmente. Pero mi no ta wak programanan asina riba nos canalnan local.”

Sr. Shurman a pone tur su ideanan y vision riba papel. Pa casi 4 aña e ta purbando di convence esunnan encarga cu maneho social di su plannan. “Nan ta entusiasma. Y mi ta compronde cu cambio ta tuma tempo. Sinembargo, aki na Aruba cos ta bay hopi mas slow cu afo. Aunke mi semper ta bisa: ban cuminsa cu algo chikito. Tin hopi luga bashi den bario cu facilmente nos por habri pe hobennan. Ban cuminsa cu un luga, un trahado social, cu ayudo di stagiaire. For di esey nos por crece.”