Laboratorio Mericano, Moderna a anuncia ayera cu su vacuna contra coronavirus a produci anticuerpo suficiente pa neutralisa e malesa den pashent cu a ricibi e dosis.

E resultadonan, publica ayera den New England Journal of Medicine, ta desprende di e etapa inicial di prueba di e vacuna, cual a tuma luga den 45 boluntario den luna di maart ultimo.

Segun e cientificonan involucra den e proceso a splica, e personanan aki a desaroya un cantidad di anticuerpo comparabel na esun di persona cu a supera e malesa di forma natural. Dokter Lisa Jackson, lider di e estudio, a indica cu e resultadonan ta ‘un stap esencial necesario pa sigui dilanti cu estudionan cu por realmente determina si e vacuna ta protege contra infeccion’.

Ningun di e boluntarionan a reporta efecto secundario grave. Mas di mita di nan si a informa riba sintomanan similar na griep – cansancio, dolor di cabes, calafriu, kentura y dolor unda a ricibi e hangua – algo cu ta sucede cu otro vacuna. E sintomanan a dura apenas un dia, e cientificonan a indica, y no ta di un gravedad cu ta implica necesidad di termina e test.

“Sin importa con ta analisa, esaki ta bon noticia”, segun principal epidemiologo di Cas Blanco, Anthony Fauci, den dialogo cu AP. E accionnan di Moderna a dispara un 16.4% despues di ciere di mercado Mericano. E balor di e farmaceutica a aumenta cu mas di 300% e aña aki.

E anuncio ta tuma luga riba mesun dia cu e compania farmaceutico a anuncia cu lo inicia e tercer y ultimo etapa di prueba alrededor di dia 27 di juli. Lo administra e vacuna na 30mil persona den 87 distinto locacion na Merca. E suhetonan di e test lo yuda compara e vacuna cu inyeccionnan placebo y evalua si dos dosis di e vacuna, conoci como ARNm-1273 ta confirma e resultadonan di e test inicial door di produci anticuerpo contra Covid-19.

A diferencia di vacuna tradicional, cu ta inyecta un virus debilita of inactivo, of un fragmento di virus pa desencadena un respuesta immuun, e producto di Moderna ta utilisa material genetico yama ARN mensahero pa haci cu e celnan produci e proteina ‘spike’ di coronavirus.E tratamento ta rekeri inyeccion di dos dosis, administra cu un luna di diferencia. Segun e estudio a indica, e prome a deriva den e generacion di anticuerpo, pero tabata e segundo cu a produci un respuesta immuun significativo.

Gobierno Mericano ta spera di tin resultadonan di e prome etapa di test pa fin di e aña aki. Si esaki sucede efectivamente, lo representa un record di velocidad pa desaroyo di un vacuna. E boluntarionan involucra den prome etapa di e estudio tabata hoben y adulto entre 18 y 55 aña di edad den bon estado di salud. E segundo, cu a finalisa na mei, a expande pa inclui persona di edad avansa, entre nan algun den bentana cualifica como di riesgo. E resultado di esaki ainda no a keda publica.

E tercer y ultimo etapa lo inclui persona di edad mas avansa ainda, y otronan cu condicionnan preexistente. Es decir, esunnan cu a representa e mayor cantidad di fayecido como consecuencia di coronavirus nobo.

E empresa, basa na Cambridge, Massachussetts a indica na juni cu por fabrica entre 500 y mil miyon di dosis pa aña cuminsando na 2021, danki na un acuerdo di colaboracion cu farmaceutico Suiso, Lonza, cu tambe a garantisa distribucion di dosis necesario pa completa e estudio.