(AP) – Cu lagrima den su wowo, Nathan Nkunzimana a conta con el a mira un video di un mucha ta ser abusa sexualmente y otro video un muhe cu tabata ser asesina.
8 ora pa dia, su trabao como moderador di contenido pa Facebook ta rekeri cu e tin cu mira e horor pa e resto di mundo no mester haci esaki. Algun coleganan abruma hopi biaha ta grita of yora segun Nathan ta conta. Awo, Nkunzimana ta entre casi 200 ex empleado na Kenya cu ta demandando Facebook y contratista local Sama pa e condicionnan laboral cu por tin efecto riba moderadornan di contenido den henter mundo. Esaki ta e prome desafio den corte conoci fueradi Merca, unda Facebook a yega un acuerdo cu moderadornan den aña 2020.
E grupo a ricibi empleo na e gigante di rednan social pa moderacion di contenido via un contratista na Nairobi, unda e empleadonan ta evalua publicacionnan, videonan, mensahenan y otro contenido di usuarionan den henter Africa, kitando tur contenido cu ta ilegal of dañino y den incumplimento cu e standard di comunidad y termino di servicio.
Facebook y Sama a defende nan practicanan.
Cu tiki certidumbre tocante con largo e caso aki lo tuma pa conclui, e moderadornan a expresa sufrimento mientras cu nan placa y permiso laboral ta caba y nan lucha cu e imagennan traumatico cu ta keda tormenta nan. “Si bo ta sinti confortabel ta consumi contenido riba Facebook, e ta pa motibo cu tin personanan manera aki cu tabata riba e pantaya ey prome ta revisa si ‘esaki ta bon pa ta aki?’” Nkunzima, un tata di 3 na Burundi a conta The Associated Press na Nairobi.
E homber di 33 aña a bisa cu moderacion di contenido ta manera “soldaatnan” cu ta ricibi e tiro na luga di e usuarionan riba Faceboo, cu empleadonan mirando contenido dañino y traumatisante manera suicidio, asesinato y abuso sexual pa sigura cu esaki no lo yega bista di e usuarionan. Pa Nathan, y otronan, e trabao a cuminsa cu un sentido di orguyo, sintiendo cu “nos ta heroe pa e comunidad,” el a expresa. Sinembargo a medida cu a cuminsa mira contenido alarmante a bolbe trece dilanti traumanan pasa pa algunnan manera su persona cu a huy for di violencia politico of etnico, e moderadornan a mira tiki sosten y un cultura di secreto.
Nan tabata ser pidi pa firma acuerdonan di privacidad, unda cu nan no por bisa ningun persona tocante loke nan ta wak na trabao. Articulonan personal manera celular no tabata permiti na trabao. Despues di su turno na trabao, e tabata yega cas agota y hopi biaha tabata cera su mes den camber pa lubida tur loke el a mira na trabao. Nisikiera su casa tabata sa con su trabao ta.
Awendia, e ta cera su mes den camber pa evita su yiunan su preguntanan tocante dicon e no ta traha mas y dicon nan no por sigui bay scol. E salario pa moderadornan di contenido tabata 429 dollar pa luna, cu personanan cu no tabata di Kenya ricibiendo un suma ademas di esaki.
Contratista di Facebook basa na Merca, Sama, no tabata haci suficiente pa sigura cu ta ofrece terapia profesional post- traumatico na e moderadornan den e oficinanan di Nairobi. El a bisa cu e conseheronan no tabatin suficiente training pa lidia cu loke su persona y su coleganan tabata experiencia.
Meta a bisa cu su contratistanan ta obliga paga nan empleadonan riba e standard di e industria den cual nan ta opera y provee sosten na e sitio di dokternan cu tin training. E vocero a bisa cu Meta no lo comenta riba e caso di Kenya.
Den un email,. Sama a bisa cu e salario cu nan ta ofrece na Kenya ta 4 biaha mas cu e minimum loon local y cu mas di “60% di empeladonan masculino y 70% di empeladonan femenino tabata biba bao e linea di pobresa internacional (menos di 1.90 dollar pa dia” prome cu nan a ser contrata. Sama a bisa cu tambe tur e empleadonan tabatin “acceso ilimita na terapia sin miedo di consecuencia.”
Facebook a inverti den oficinanan di moderadornan di contenido mundialmente despues cu nan a ser acusa di permiti lenguahe di odio circula den paisnan manera Ethiopia y Myanmar, unda conflictonan ta matando miles di persona y contenido dañino ta publica den un variedad di idioma local. Busca pa nan habilidadnan den varios lenguahe Africano, e moderadornan di contenido a ser contrata pa Sama na Kenya y pronto despues a haya nan mes ta mira contenido grafico.
Hopi di e moderadornan aki ta preocupa cu “e basura aki” lo keda den nan cabeas pa semper. Un di nan, Fasica, ta culpa Facebook pa e falta di cuido di salud mental apropia y pago y ta acusa e contratista local di a usa su persona pa despues deshaci di dje. “Facebook mester sa kico ta pasando,” el a expresa, “nan mester preocupa pa nos.”
