Crisis di corona por brinda oportunidad pa reforma turismo pa uno sostenibel
Crecemento descontrola di un solo pilar economico, esta turismo, a pasa su limite di capacidad di carga y ta crea presionnan riba sostenibilidad y comunidad. Pero tanto St. Maarten y Aruba lo por reinventa nan economianan pa ta basa riba balor agrega en bes di crecemento sin control.
Esey ta e enfoke di investigado y economista specialisa den desaroyo, Arjen Alberts.
Arjen Alberts ta bay promove otro siman den Estudionan di Desaroyo Internacional cu su investigacion “Small Island Tourism Economies and the Tourism Area Lifecycle. Why Aruba and Sint Maarten have exceeded their carrying capacity.”
Arjen Alberts conoce Aruba y St. Maarten bon. Pa hopi aña el a biba na Aruba, unda el a hasta contribui na e hala cientifico di AVP, esta FESCA. E ta bibando actualmente na St. Maarten.
Un solo pilar economico
Argumento di Arjen Alberts ta cu Aruba y St. Maarten ta un di e economianan di isla cu intensivamente ta mas orienta riba turismo. E crisis di Covid a tambalia e modelo turistico aki. Alberts a investiga con e dos islanan aki a yega asina leu cu nan a keda depende na un solo pilar economico cu ta e modelo di turismo.
Alberts ta promove dia 21 di september na Universidad di Amsterdam riba e investigacion aki.
Cu e modelo di un economia turistico como unico pilar tin hopi desbentaha tabata conoci prome cu Covid. E modelo no tabata uno sostenibel tanto riba e ambiente social como medio ambiente. Asina mes e modelo a wanta sorpresivamente largo, segun Alberts. E atakenan di september 11, 2001, e desaparicion di Natalee Holloway na Aruba na 2005, e crisis bancario di 2008/2009, ni e horcannan di 2017 na St. Maarten a tambalia e modelo aki.
Pero e crisis di corona si. E crisis aki, pa prome biaha a expone e vulnerabilidad fundamental di e modelo aki, esta e mobilidad di e turista.
Arjen Alberts, kende ta economista di desaroyo, a investiga e impacto di e modelo di turismo aki y kico a haci cu Aruba y St. Maarten a dicidi pa sigui asina largo cu e modelo aki. Y ta puntra di con a ignora e señalnan anterior cu e modelo aki a yega su maximo.
A yega e limitenan
“Durante e periodo di mi investigacion, prome cu e crisis di corona, ya Aruba y St. Maarten a yega nan limitenan di nan capacidad di carga, esta e nivel di turismo cu un pais por anda cune, sin cu esaki tin efecto negativo pa medio ambiente, pa e comunidad of e calidad di e producto mes. Ora cu yega e limitenan aki, e ta nifica cu un isla di economia basa riba turismo intensivo ya no ta sostenibel. Mi tabata kier con e procesonan social economico riba e islanan tabatin un influencia riba e desaroyo aki,” Alberts a splica den e introduccion di su investigacion. “Di con a sigui, mientras cu e desbentahanan tabata asina bisto, na un forma claro.”
Problemanan cu a lanta
Alberts a señala e diferente problemanan cu a lanta cabes como consecuencia di e modelo di turismo aki cu a pone sostenibilidad riba presion.
E producto turistico mes a bira bieu y gasta, cu a conduci na un caida den e ripiticion di bishitanan y un posicion di concurencia mas debil. E industria turistico a crece di mas, y a tuma cargo di tur espacio disponibel cu a conduci na turismo excesivo.
E necesidad laboral den e industria turistico a stimula un crecemento rapido di e populacion pa motibo di inmigracion. Sinembargo, mirando cu vivienda, enseñansa, salud publico y infrastructura a keda atras, a bin un presion hopi pisa riba e fabrica social cu tabata hopi fuerte te na e momento ey.
Aunke cu Gobiernonan y organisacionnan sectoral a bira consciente di e problemanan aki cu suficiente anticipacion, nan no a tuma e pasonan pa reforma e modelo of pa frena e crecemento. Pues, e economianan di isla basa riba turismo a keda crece.
Pakico a sigui cu e mesun modelo
Alberts a declara cu e falta di reforma ta debi na un combinacion di caracteristicanan social-economico. Por ehempel tabata un crecemento extensivo continuo y e economianan di isla tabata hunga un papel importante den desaroyo di e region. Ambos pais tabata sea e proveedor regional cu tabata crea trabou pa region, segun cu e industrianan riba e otro paisnan den region tabata crece of bira mas chikito.
Mas ainda, e economianan di e islanan tabata resiliente, a pesar di e problemanan cu tabata presenta. Trahadonan cu tabata perde nan trabou un caminda, pa medio di por ehempel e migracion circulatorio of strategianan di mercado laboral individual, por a haya trabou otro caminda. Of inmigrantenan tabata bolbe nan pais despues di un caida economico, sea espontaneamente of stimula, cu a limita e consecuencianan di e golpinan grandi.
Alberts finalmente ta mira un papel den un structura di maneho horizontal debil. Esaki ta caracterisa su mes, cu un acercamento di ‘laga cos pasa,’ cu tabata stimula e clima di inversion y promove e desaroyo di e modelo di turismo den su inicio. Sinembargo, unabes cu a yega na su crecemento maximo, a yega un momento cu e efecto a cambia. Locual prome tabata un beneficio, despues a bira un desbentaha. Gobiernonan, pa motibo di falta di poder di maneho, no por a controla e economia creciente y e comunidad mas, mientras cu a yega alabes na e limitenan di e capacidad di carga.
Kico pa haci pa evita collapse
Aunke cu e papel di e dinamico di gobierno y social-economia ta yuda compronde pakico a wanta na un modelo unda ta depende solamente riba un pilar, cu ta turismo, Alberts ta lansa e pregunta con e economianan di isla por cambia e direccion. “Simplemente, sigui e status quo no ta un opcion real. Den e casonan mas optimista, e islanan por enfoca riba locual nos ta considera un trayecto di rejuvenecemento/ Esaki ta nifica cu ta bay maneha e industria turistico na un manera totalmente diferente, tanto na nivel di calidad y cuantitativo. Crecemento adicional mester bin a base di balor agrega y productividad mas halto, en bes di e aumento constante den volumen.”
E crisis di corona ta fortifica enormemente e urgencia di e escohencia dilanti cua e paisnan ta para awor. Netamente awor cu e industria turistico a para practicamente completamente, tin e oportunidad awor pa reforma e modelo aki. No tur e companianan turistico lo sobrevivi e crisis aki. Aruba y St. Maarten lo por drenta un caminda nobo, na momento cu cuminza nan economianan di nobo. Un caminda cu ta na un escala mas chikito, mas sostenibel, basa riba balor agrega, en bes di crecemento di cantidad.
Promocion di Alberts lo tuma luga dialuna dia 21 di september na e Agnietenkapel di Universidad di Amsterdam, den presencia di su promotor Profesor Dr. Isa Baud y co-promotor Dr. Hebe Verrest.
