![NETHERLANDS-POLITICS-BENEFITS](https://www.bondia.com/wp-content/uploads/2023/06/Mocion-pa-sigura-ley-di-Reino.-ALEXANDRA-696x450.jpg)
Den Tweede Kamer di Parlamento Hulandes a tuma lugar ayera un debate pa trata algun mocion di diferente parlamentario encuanto e situacion na e islanan di Reino Hulandes den Caribe.
Pa Aruba tabata di especial importancia un mocion di sra. Roelien Kamminga (VVD) y Joba van den Berg (CDA), cu tabata un accion pa sigura cu Aruba lo no haya extension di e prestamo haci durante e crisis di Covid-19 a base di condicion faborable, interes abao, si gobierno di Aruba no ta dispuesto pa acepta e ley di Reino di supervision financiero. Tambe den e mocion ta pidi gobierno Hulandes pa maneha un interes mas halto segun mercado pa e prestamo tanten no tin un ley di Reino pa supervision financiero vigente, “y si den e periodo venidero lo tin paso significativo tuma den direccion di e entrada na vigor di tal, refinancia e prestamonan solamente a corto plaso cu un porcentahe di interes cu ta pas cu e situacion cu ta en todo caso mas halto cu e interes bao di condicion faborable.”
E mocion di Kamminga ta parce un advertencia na secretario di estado Alexandra van Huffelen, cu lo a mustra disposicion di permiti Aruba financia e prestamo externamente, pafor di Reino, na interes comercial internacional. Esaki lo a laga e caminda habri pa no cumpli cu e compromiso entre e paisnan cu lo mester bin un ley di Reino di supervision financiero.
Tabatin otro mocion tambe di Sra. Van den Berg y Kamminga den cual ta urgi gobierno Hulandes pa tuma na cuenta e relacion entre capacidad di repago (di debe) y e reformanan necesario, cu cual tur e gobiernonan tin compromiso expres. Pa esaki ta pidi anto pa considera efectonan di varios aña financiero y presupuestario pa acopla e financiamento pa hopi aña na e reformanan. E mocion aki ta toca tur tres pais autonomo pa cu e prestamonan di liquidez haci durante crisis di Covid.
Den su reaccion van Huffelen a mustra di no tin problema cu e mocion, mustrando cu e combinacion di e ley insular (LAft) y e protocol a conduci na bastante discusion y cu un ley di Reino lo compromete tur e partidonan envolvi y cu e pais en cuestion, Aruba, lo por beneficia den forma di “financiamento bentahoso di inversion, pasobra cu esey di mes ta indica cu tin supervision riba finanzas.” Tambe e Secretario di Estado a bisa cu “mescos cu pa e otro paisnan e ley di Reino aki mester tin un ‘eindigheidsbepaling’ (stipulacion di duracion). Si finanzas gubernamental ta duradero y na orden anto naturalmente e supervision ey lo no ta necesario.”
Van Huffelen a referi tambe na e concepto di ley di supervision cu, segun el a recorda, a keda acorda basta tempo pasa caba: “Tin caba un propuesta, no solamente cerca e Kamer aki, sino tambe cerca Staten di Aruba. Mi ta boga anto pa nos combina e acuerdonan ‘zakelijk’ cu nos mester cera cu otro tocante e refinanciamento cu un ley di Reino di supervision.”
E tratamento ayera tabata concerni solamente e debate limita unda cada orador ta haya solamente dos minuut pa duna nan punto di vista, mientras e mocionnan lo ta den votacion otro siman.