Diabierna atardi na parlamento un mocion pa bin cu un moratorio a corto plaso contra desaroyo di hotel y condominio a keda menciona.

Durante e segundo reunion den parlamento Daphne Lejuez, parlamentario di fraccion di MEP a trece varios mocion dilanti pa loke ta trata medio ambiente. E parlamentario a expresa cu considerando cu comunidad continuamente ta desaproba di desaroyo descontrola y destruccion di naturalesa riba medionan social y por medio di organisacionnan no gubernamental, e ta trece dos mocion dilanti cual un di nan ta encera trece un moratorio pa evita construccion di mas hotel.

Sra. Lejuez a splica cu e expansion di mas camber hotelero lo tin impacto no solamente pa nos medio ambiente pero tambe pa e capacidad cu tin na Aruba pa tuma mas trahado di afo cu lo mester servicia e cambernan aki, segun e na 2 pa 4 pa cada camber adicional.
Esaki lo tin su efecto riba e infrastructura den diferente dimension, segun sra. Lejuez.

P’esey e ta urgi gobierno pa haci evaluacionnan y compara gastonan pa anula compromisonan pa proyectonan hotelero haci versus e costo y consecuencia pa comunidad si mester bin mas hende pa yena mantencion di cada camber adicional. E resultado di esaki nan lo mester trece bek parlamento.

E di dos mocion ta recorda cu fraccion di AVP a trece dilanti y parlamento a aproba riba 18 di mei 2010 un mocion pa institui un moratorio contra hotel, timeshare y condominio. E moratorio aki lo mester a dura por lo menos 10 aña pa asina bin cu un proyecto di ley mientrastanto. Aunke a bin cu esaki e parlamentario a señala cu awo 8 aña despues a bin cu compromete Aruba cu casi 7 mil camber adicional.

P’esey ta urgi gobierno pa declara un moratorio na corto plaso pa desaroyo den forma di hotel, condominio, etc., cu excepcion di boutique hotels di entre 75 pa 150 camber sin posibilidad di expansion y cu exclusion di area di pariba di brug.

Ora di entrega un proyecto pa desaroya e desaroyado mes ta responsabel pa haci un estudio di impacto medio ambiental. Sinembargo ta custumber na otro paisnan entre otro na Hulanda unda ta lanta un comision independiente pa evalua si un rapport di un proyecto tin cierto impacto riba medio ambiente.

Den un reaccion cortico Greg Peterson di Aruba Birdlife Conservation a conta Bon Dia Aruba cu ‘ABC ta pro moratorio riba tur hotel y condominio. Tur’.