Ayera a tuma luga e prome reunion publico di parlamento nobo riba e status di minister demisionario Paul Croes (AVP). Un mocion di desconfiansa a wordo pasa cu 12 voto pro y 9 contra. Prome minister demisionario Mike Eman y fraccion AVP a subraya cu henter e reunion aki tabata innecesario pa motibo cu minister Croes a entrega su carteranan caba.

Nan argumento ta entre otro cu e reunion aki a wordo yama pa desvia asuntonan real cu ta pasando actualmente den formacion di gobierno y pa sigui difama Paul Croes.

Presente na e reunion aki tabata naturalmente tur 21 parlamentario y prome minister demisionario Mike Eman (AVP), hunto cu minister demisionario di Salud Publico Alex Schwengle (AVP). Esaki tabata reunion number cinco di aña parlamentario 2017/2018, e prome reunion di parlamento number dies. E agenda di ayera mainta tabata pa trata e status di minister Paul Croes, y di dos tabata aclaracion y elaboracion riba proyecto di hospital. Cada punto di agenda a keda separa. Ayera a logra na solamente trata e prome punto anto lo regresa diamars mainta otro siman pa sigui cu e di dos.

Lider di partido MEP y formador di siguiente gobierno Evelyn Wever Croes ta laga sa cu: “E parlamento nobo cu e mocion di desconfiansa aki ta enfatisa cu no ta tolera un minister cu ta wordo sospecha di corupcion serio, encarcela anto den status di minister demisionario. Cu esaki e parlamento nobo ta duna e prome señal cu integridad no ta djis un palabra, sino ta un principio. Y ta coregi eror cometi pa e gobierno y parlamento anterior. Sinti e cambio!”

E sala di publico no tabata hopi yen pero esunnan cu a bini varios biaha a interumpi e reunion cu batimento di man of gritamento manera semper sa sosode. E emocionnan a bay poco halto ora entre otro parlamentarionan nobo manera Ricardo Croes (RED) a hiba palabra, of ministernan demisionario/ parlamentarionan Benny Sevinger (AVP) y Arthur Dowers (AVP) riba cierto puntonan.

E presidente di parlamento Guillfred Besaril (MEP) a subraya cu e reunion di ayera mainta ta uno ‘sumamente importante’ cual a cuminsa na luna di mei di e aña aki.  “Tin un bista riba nos. Y esaki ta algo cu mi a tuma nota di dje ora cu mi a mira con e diferente reunionnan a desaroya nan mes. Tin un bista riba nos no solamente di parti di Reino, Hulanda, pero nos partnernan tambe den Reino.” E ta sigui cu: “Nos ta den un situacion caminda cu nos tin un miembro cu ta carga un funcion politico cu lamentablemente ta encarcela cu un investigacion contra dje.” Despues di resultado di eleccion, segun sr. Besaril, e ta haya cu tin ‘un expectativa pa loke ta di pueblo riba kico ta corecto pa un parlamento haci’.

Motibo pa reunion urgente
E motibo pa e reunion aki segun e partidonan den coalicion a trece dilanti, tabata principalmente trata e status di e minister demisionario Paul Croes, cual miembronan di oposicion a pidi pa un elaboracion di esaki. Sra. Wever-Croes: “Nos no ta hendenan cu ta papia so di integridad, nos ta actua tambe. Nos ta bisa loke nos ta haci y nos ta haci loke nos ta bisa.” E reunion no tabata di intencion di bay riba e persona y di kico e ta wordo sospecha segun e miembronan di coalicion a expresa. A pesar cu riba e punto di agenda na parlamento Paul Croes su nomber ta menciona.

“Nos di MEP for di 2015 tempo di oposicion tabata trece e tema aki pa dilanti. E reunion ta bay riba e funcion di e minister y e rol cu e gabinete di gobierno a ehecuta den esaki pa e echonan cu ta hopi serio cu ta wordo sospecha pe. Principalmente e ta bay pa e pregunta aki: si e minister en cuestion tin derecho na momento aki cu tin un parlamento nobo, di wordo yama un minister demisionario. E conclusion ta cu e minister aki no por ta demisionario.” A pidi e reunion aki pasobra e caso di e minister en cuestion aki a causa hopi daño na e imagen y integridad di pais Aruba,  el a sigui expresa.

AVP: ‘Unda e parti humano a keda’
Oposicion di AVP ta subraya mesora cu nan ta spera den futuro cu e siguiente gobierno sinta, cu reunionnan wordo yama  mesun lihe cu esun aki. Nan a clasifica e reunion aki manera un otro ehempel con cosnan no a cambia cu e partido geel riba loke ta persecucion politico, difamacion di hende y ‘trapa riba graf’ di esnan cu ta den momentonan duro. Minister demisionario y parlamentario Mike de Meza (AVP) ta esun prome cu a puntra den un punto di ordo kico ta e nificacion di e reunion aki pa locual ta e status di minister di asuntonan social. El a haya cu esaki riba papel ta limita y ta keda habri pa interpretacion di cada fraccion y parlamentario.

“Lastima cu e reunion a cuminsa caminda cu ningun persona a trece e parti humano dilanti di sr. Paul Croes. Na fin di dia e tabata un parlamentario, presidente di parlamento y minister.” El a sigui bisa cu: “Nos a mira cu e famia di sr. Paul Croes ta pasando den momentonan sumamente dificil. E pregunta ta tambe si sr. Paul Croes ta wordo trata tambe segun e normanan di derechonan humano. Mescos esaki ta conta pa tur hende den KIA, pero nos por a compronde cu e tin un limitacion, no tin mag di wak television, haya ningun buki pa lesa, papia cu ningun persona ni su famia. Na fin di dia nos tur ta keda ser humano. Nos tur a firma tratadonan cu mester cumpli cu e partinan fundamental di derechonan di ser humano.”