Hopi placa ta wordo paga na huur di edificionan no adecuado cu ta bira localidad temporario pa scolnan cu ta pendiente pa nan wordo renoba.

Si bo ta haci un calculacion cuanto a paga den huur so compara cu e gasto mes di renobacion, e ta exorbitante y inaceptabel.

Pa trece un ehempel, Colegio Frère Bonifacius tin 8 aña largo den un otro localidad pagando huur. E pago di huur aki pais Aruba (gobierno) ta pag’e. Pero si nos ta tuma un huur rond di 35 mil florin pa luna den un aña, e ta mas cu 400 mil florin. Kiermen den 8 aña e ta casi 3.5 miyon florin. E placa ey por a wordo inverti debidamente pa renoba mas scol den mal estado, incluyendo e construccion di e scol aki mes cu nan sede a wordo basha abao caba.

Scolnan den mal estado

Tin cantidad di scol den mal estado y pendiente pa nan wordo renoba y cu no a haya atencion debido durante aña 2020, debi na e pandemia di Covid-19. Segun directora di SKOA, Anuesca Baly, e no ta referi unicamente na scolnan di SKOA, sino scolnan di Aruba en general. Ya cu no ta scolnan di SKOA so ta den edificionan temporario y no adecuado pa tin un scol di mucha den dje.

Un scol mester tin espacio adecuado y safe pa e muchanan por core. Sra. Baly a bisa cu si e muchanan ta den klas e no ta un problema. Pero unabes cu e muchanan sali for di klas nan tin pausa pa nan core y recrea libremente.

Den e caso aki, Imelda Kleuterschool, Colegio Frère Bonifacius, St. Aloysius cu ta scolnan di SKOA, pero tin mas scolnan cu tabata y cu ainda ta den edificionan no adecua. Sra. Baly ta haya e situacion aki lamentabel.

 

Na 2020 y a pesar di e pandemia dos scol a keda renoba: Imelda Kleuterschool y Cacique Macuarima School. E menasa di e virus aki a demostra cu caminda e scol aki tabata ubica den un edificio di shopping mall no tabata esun adecua pa tin alumno. E tabata un situacion cu SKOA tabata sa adelanta caba.

E muchanan di Imelda Kleuterschool a sali for di nan edificio na De la Sallestraat cuater aña pa asina duna espacio pa bin cu un trabao di renobacion. Pero prome cu Covid e proceso aki no a haya atencion y tambe el a tarda pa diferente motibo, pero esun principal tabata motibo financiero.

Despues cu Cacique Macuarima School a bira victima di un candela misterioso ainda, e hecho aki cu a conmove henter comunidad, a trece un parti positivo. E comunidad a reacciona solidariamente yudando e scol aki. Pero dunando tambe e sosten necesario tanto na e cabesante, docentenan y alumnonan di Cacique Macuarima School.

A pesar cu e trabao di renobacion por a tarda mas di loke tabata programa, SKOA a pusha pa nan logra habri e scol aki menos laat posibel na comienso di october ultimo. E renobacion aki tabata un logro grandi pa SKOA.