(infobae) – Jose Camilo Manzur, director ehecutivo di Asociacion Colombiano di Distribuidornan di Energia (Asocodis) a adverti tocante e crisis financiero creciente cu empresanan distribuidor di energia ta enfrenta na Colombia debi na acumulacion di debe pa subsidionan no paga.
Segun Manzur, si gobierno no actua lihe, usuarionan por mira un aumento riba nan factura di coriente, pasobra e empresanan no lo por sigui financia e subsidionan aki, y ta e hogarnan Colombiano lo asumi e pago.
“No ta un advertencia nobo y ya ta bin ta cambia. A disminui opcion di tarifa, pero a aumenta subsidio. Tin empresa cu ta bisando mi cu nan no por financia e subsidionan mas, empresanan chikito.”
El a agrega cu “Ta compronde loke ta propone di proceso di autogeneracion bayendo dilanti, pero e problema nos tine awe.”
Segun el a indica, e debe total cu gobierno nacional tin cu empresanan distribuidornan ta yega na siete biyon pesos, di cual aproximadamente 60 porciento ta coresponde na debe publico, tanto di organismo nacional como teritorial. Dentro di e cifra aki, $3.4 biyon ta pertenece na Opcion di Tarifa, $2.4 biyon na subsidio, $0.2 biyon na prijs y exposicion na bolsa, y un biyon di debe oficial, segun datonan proporciona pa Ascodis.
Manzur a splica cu e falta di recurso pa financia subsidio no ta implica un aumento den tarifa di coriente, sino den e factura cu e usuarionan ta ricibi. Esaki pa motibo cu subsidio ta permiti estado yuda e usuarionan mas vulnerable, specialmente esnan den estrato 1, 2 y 3, pa cubri nan consumo basico. Sin e subsidionan aki, e usuarionan lo tin cu asumi e costo total di e factura, loke por representa un aumento di hasta 150% den algun caso.
E impacto lo ta specialmente severo pa empresanan chikito, manera esunnan cu ta opera den regionnan manera Putumayo, unda mayoria di usuario ta pertenece na e estratonan mas abao. Segun Manzur a splica, un usuario di estrato 1 cu actualmente ta paga 40mil pesos danki na un subsidio di 60%, awo lo mester paga 100mil pesos si e subsidio desaparece. “Nos ta haci un yamado pa gobierno nacional sostene e hende mas vulnerable di e pais aki,” e lider gremial a bisa.
Di otro banda, e Opcion di Tarifa, cu ta busca alivia e peso financiero di empresanan a traves di credito, tabatin un avance limita, Manzur a conta. Di e dos biyon pesos disponible a traves di Findeter, apenas a desembolsa 16%, loke no ta suficiente pa resolve a situacion.
Mirando e situacion, Asocodis a solicita Gobierno pa considera otro medida, manera titularisacion di e debe y aporte di Presupuesto General di e Nacion y di Sistema di Regalia, pa mitiga e crisis y evita cu e usuarionan mas vulnerable ta esunnan mas afecta.
