(AP) — Mitsubishi Heavy Industries y Agencia di Energia Atomico Hapones a firma un acuerdo pa participa den un proyecto di energia nuclear di proximo generacion cu TerraPower, un compania funda pa Bill Gates.
E Memorandum of Understanding firma diaranson ta pidi pa cooperacion pa desaroya tecnologianan nuclear avansa, Mitsubishi Heavy a bisa.
Ubica na Kemmerer, den desierto di Wyoming occidental, e proyecto di demostracion ta bay usa un reactor nuclear no tradicional, fria pa sodium. E ta bay contrata trahadornan di un planta di energia di carbon cual ta programa pa cera pronto.
MHI, un di e conglomeradonan industrial mas grandi di Hapon, a bisa cu ta bay explora maneranan pa provee sosten tecnico y pa desaroya e reactor. “MHI tambe ta bay trece experticio y conocemento obteni mediante su asociacion pa contribui na e avance di innovacion nuclear na Hapon”, e compania a bisa den un declaracion.
Industria nuclear Mericano ta para, proveyendo stabiel 20 porciento di energia di e pais pa un decadas memey di e proceso costoso y largo di construi plantanan nuclear convencional enorme.
Sector di energia atomico Hapones ta den crisis desde e meltdown na planta Fukushima Dai-Ichi na su costa nort oriental despues di un temblor y tsunami masivo na maart 2011. Pero su gobierno ta mira energia nuclear como esencial pa logra emisionnan di carbon net zero pa combati cambio climatico.
TerraPower tin plan pa haci su planta util pa red di energia actual di cada bes mas energia renobable. Un bateria di salo ta bay permiti e planta aumenta produccion di electricidad riba demanda, compensando ‘dips’ den electricidad na momento cu biento no ta supla of solo no ta briya.
Apertura di e planta ta leu ainda – 2028 segun plannan actual.
E maneho no ta nobo. Rusia tin un reactor comercial fria pa sodium den uso na capacidad completo desde 2016 y a test diseñonan asina na varios lugar na Merca.
GE Hitachi Nuclear Energy, un aliansa entre GE y Hitachi di Hapon, a traha cu TerraPower pa desaroya e reactor di sodium y bateria di salo.
Mitsubishi Heavy a bisa cu e acuerdo cu TerraPower ta bay facilita esfuersonan amplio, conhunto pa desaroya tecnologia rapido di reactor. Gates, e famoso co-fundador di Microsoft, a cuminsa Terrapower basa na Washington na 2008, y ta presidente di su hunta.
