(NLTimes) – Casi mita di e mas o menos 9,300 scol primario y secundario na Hulanda ta den necesidad desespera di renobacion of manutencion, segun figuranan nobo di Bouwend Nederland. “E scolnan aki no ta saludabel y ta un peliger pa tanto e docentenan como e studiantenan su salud,” Ruben Heezen di Bouwend Nederland a conta NOS.

“Tambe e tin un efecto real riba nan prestacion y siñamento.”

Segun Bouwend Nederland, e asociacion mas grandi di compania di construccion na Hulanda, mas di 4,600 scol ta lidiando cu humedad, bacteria y demasiado tiki aire fresco. Nan absolutamente no ta cumpli cu e rekisitonan di salud, sostenibilidad y ventilacion actual.

E scolnan ta responsabel pa e mantencion di nan edificio. Municipalidadnan mester paga pa e scolnan su renobacion of construccion nobo. Sinembargo esaki no semper ta funciona den practica. PO-Raad, e conseho pa scolnan primario, a declara na e noticiero. “E scolnan y municipalidadnan ambos tin demasiado tiki placa. Despues ta bini un pelea, simplemente pa motibo cu tin demasiado tiki placa,” PO-Raad su president Freddy Weima a comenta. “A inverti hopi tiki placa pa decadas.”

Den su respuesta, Minister di Educacion Dennis Wiersma a bisa cu e placa pa mantencion ta bini for di e municipalidadnan, y e placa cu e ministerio ta duna no por ser usa pa e proposito aki. El a conta reporteronan riba diabierna cu e tabata kier a traha como un intermediario, pa asina por haya fondo disponibel dentro di e presupuesto pa proyectonan di propiedadnan social y metanan di e clima.

El a agrega cu e lo papia cu su coleganan relevante den e Gabinete cu ta encarga cu e presupuestonan aki, pues Ministter hugo de Jonge y Minister Rob Jetten. Adicionalmente, Wiersma kier pa e standard di mantencion di e scolnan su edificio keda dicta cu mas claridad den e ley Hulandes.

PO-Raad y mas di 20 otro organisacion, incluyendo Bouwend Nederland, recientemente a entrega un apelacion na e Gabinete pa inverti 730 miyon euro den drechamento di scolnan bieu. E gabinete a aloca fondo pa educacion, segun PO-Raad. “Sinembargo nan a lubida completamente di e edificionan. Esaki mester ricibi hopi mas prioridad.”

Tweede Kamer, parti di e parlamento Hulandes, lo tin un debate unda cu lo trata e edificionan di scol cu Minister Dennis Wiersma pa Educacion Primario y Secundario proximamente riba dia 1 di december.