Un persona anonimo a tuma contacto cu Bon Dia Aruba despues cu nos a publica cu animalnan exotico cu a yega ilegal den boto aña pasa, nan no ta na Aruba mas. Segun e fuente aki, esaki no ta berdad anto ta solamente e cachonan no ta riba e isla mas.
Bon Dia Aruba tin algun siman caba ta purba di haya sa con a para cu e animalnan exotico cu a drenta nos isla ilegalmente via un boto october 2016. Nos a bishita Veterinaire Dienst kende ta bisa nos cu no por divulga nada sin permiso di departamento di Salud Publico. Nos a bolbe bishita Departamento di Salud Publico algun dia pasa tambe despues di nos ultimo publicacion, kende ta laga sa cu no tin tur informacion ainda anto lo comparti esaki manera tur data ta colecta. Salud Publico tampoco kier divulga con a para cu e bestianan aki, si mas a fayece. Y husticia no por bisa nos ainda kende ta responsabel y/of lo wordo persigui pa violacion di Cites (tratado internacional di flora y fauna den peligro di extincion)
Fuente anonimo
Un persona anonimo ta bisa nos: “E informacion cu e animalnan aki no ta na Aruba mas no ta berdad. Gobierno ta purbando hopi duro si den e ultimo simannan pa manda e animalnan pa Venezuela. E situacion ta malo na Venezuela. Nan ta hasta comiendo e bestianan eynan dus no ta e miho idea pa nan bay eynan.” E ta sigui bisa cu bao ley e animalnan aki mester a wordo mata manera cu nan a yega nos isla. E bestianan a bay den cuarentena anto tur cos a keda den silencio despues di esey.
Animalnan ta na Aruba ainda
E fuente aki ta confirma na nos cu e animalnan aki a wordo trafica pa Aruba ilegalmente. Algun di e parhanan a muri, como tambe un cacho anto e resto di cachonan a bay Merca. E fuente aki tambe a relata cu tin oficialnan di Venezuela cu a bin caba pa aparentemente trata di bay cu e animalnan pero nan a wordo avisa cu nan no tin ningun derecho na Aruba pa haci esaki. “Mester por tin algo pasando anto mi no sa si ta un hende kier e animalnan of si nan kier duna nan na un persona.” E fuente ta conclui cu algun di e bestianan ta na Aruba ainda anto nan ta parti entre varios hende cu ta cuidando nan, incluyendo su persona.
Ministerio Publico
Ultimo informacion cu nos a haya di Ministerio Publico ta cu tin dos sospechoso den e caso aki cu ta wordo sospecha di importacion di animalnan ilegal. Nan lo wordo persigui pero no tin un fecha ainda poni pa hiba nan dilanti hues. E dia ey pues lo bira conoci kende ta tras di e contrabanda y kico exacto e acusacionnan ta. Mas cu esaki Ministerio Publico no kier divulga na momentonan aki.
Fiscal no sa unda e animalnan exotico ta (e pumanan chikito, macaconan etc.) pero segun Ministerio Publico, nan ta bay busca pa toch purba di haya sa. A pesar cu e no ta asunto di fiscal mas mirando cu una bes algo no ta confisca mas, nan ta kita man for di dje, Ministerio Publico ta conta nos.
