Desaparicion di un helicopter militar na Venezuela, cu 13 ocupante a bira un misterio. E incidente a sucede un luna atras.
Diaranson famia di pasahero a solicita na fiscalia pa investiga e situacion cu a surgi. “Nan (gobierno) ta bisa nos, nos lo yama boso, pero ningun hende no a mustra nos cara, mi ta desespera, mi ta busca ayudo y hende ta cera porta den mi cara”. Mi ta solicita autoridad pa bay busca mi yiu”, asina mama di soldad Alejandro Mariño Sanoja a bisa.
Famia di personanan cu a disparce a denuncia e situacion na entrada di ministerio publico na Caracas. Nan a yega na ministerio publico hunto cu politico di oposicion. Edgar Zambrano, Presidente di Comision di Defensa y Seguridad di Parlamento a bisa cu te na e momento aki nan no tin informacion si autoridad ta riba investigacion formal of no. Ligia Camejo, abogado, a sigura cu falta di informacion ta un violacion di derecho humano.
Desaparicion y teoria
E aeronave a lanta vuelo 31 di december di 2016 desde Puerto Ayacucho (estado Amazonas) cu nuebe militar y cuatro hende civil.
Operador aereo a perde contacto cu tripulacion na 70 kilometer di distancia di e punto di partida, forsa arma di Venezuela a informa. E destino di e tripulacion tabata La Esmeralda, zona ubica den mesun region. Presidente Nicolas Maduro a declara riba caso aki riba 14 di januari y el a sigura cu e buskeda ta activa “ 24 ora pa dia” Diamars ultimo Liborio Guarulla , Gobernador di Amazona a bisa cu asamblea legislativo tin un hipotesis, cu ta sospecha cu e helicopter por ta secuestra pa guerrilla di FARC, kendenan ta den proceso di laga nan arma riba caminda pa paz.
“Tin hopi hipotesis, un di nan ta cu talvez e aeronave a ser desvia pa un comunidad minero pa hiba cuminda, of otro ta cu nan a ser secuestra pa FARC”, Guarulla a opina.
“Ta sospechoso cu radar no ta traha den un zona cu presencia grandi di guerrillero Colombiano, di minero ilegal y cu delincuencia organisa, Zambrano a comenta.
