(NLTimes) – Presencia militar Hulandes na Afghanistan lo yega su fin e luna aki despues di casi binti aña. Pa conmemora e momento, ministerio di Defensa a entrega dos bandera di mision Hulandes na e Museo Militar Nacional na Soesterberg, NOS a reporta.
“Nos ta bayendo cu sentimentonan mixto. Nos ta mira e imagennan di Taliban progresando”, minister encarga di Defensa, Anke Bijleveld a bisa den un discurso. “E situacion di seguridad ta preocupante y por perde algo di e progreso”, Bijleveld a bisa.
Decenas di persona a atende e ceremonia di bandera, pero a laga 25 stoel bashi pa representa e 25 soldad Hulandes cu a fayece na Afghanistan.
Tambe a observa un momento di silencio pa e ‘cantidad di Afghano cu a fayece, e soldad- y coleganan’, Bijleveld a bisa.
Despues di binti aña, tur 10mil soldad stranhero ta retirando di e pais, incluyendo e 160 soldad Hulandes cu ainda tabata presente. Na april, presidente Mericano Joe Biden a anuncia durante un reunion di NATO cu personal militar Mericano lo bandona Afghanistan pa september di e aña aki.
E soldadnan Hulandes tabata na Afghanistan desde 2002, principalmente den provincia di Uruzgan. Despues, Hulanda a yuda train cuerpo policial Afghano na Kunduz cu meta pa mehora seguridad y stabilidad den e region.
Minister di Relacionnan Internacional, Sigrid Kaag a enfatisa cu Hulanda tin un relacion duradero cu Afghanistan. “Nos a drenta den un partnership a largo plaso cu pueblo Afghano. Un relacion cu nos no kier kibra 20 aña despues”, el a bisa.
