A traves di un carta publica riba nan website y rednan social, plataforma Raiz a anuncia e retiro di dos miembro di nan plataforma, riba dia di huramentacion di Parlamento nobo, den cual Raiz no tin representacion.
“Un danki specialmente ta bay na cada un di e 2,323 votadornan cu a wak nan mes refleha den e vision di RAIZ, un plataforma profesional cu a demostra cu gobernacion y politica na Aruba por wordo conduci exitosamente na un manera limpi, honesto y sin efecto negativo pa e trankilidad ni privacidad di nos ciudadanonan,” a bisa den e carta.
Den su comunicado, e partido a bisa cu “Awor cu temporada di campaña y dianan di fiesta a pasa plataforma RAIZ lo duna tur espacio y cooperacion pa e proceso di formacion di gobierno nobo por cana na un forma organisa y conforme locual ley ta prescribi. RAIZ ta preparando tambe pa e traspaso di cartera por bay na un forma debido y elegante, como debe ser.”
Ademas, a indica cu e plataforma a cuminsa un proceso di reforma y ta reorganisando pa proximo eleccion, y ta como parti di e proceso aki cu ta anuncia cu Raymicheline “Misha” Raymond y Carlos Guiamo, kende tabata candidato riba lista di Raiz pa ultimo eleccion, no ta forma parti di e plataforma mas. “Nos ta gradici ambos pa nan colaboracion y dedicacion durante nan tenura cu RAIZ y ta desea nan tur clase di exito.”
Finalisando, Plataforma Raiz a felicita tur partido cu a haya asiento y e parlamentarionan cu a huramenta, “specialmente e parlamentarionan cu pa prome biaha lo funciona den e organo di mas halto na nos pais.”
