Mediante un comunicado di prensa parlamentario y lider di fraccion ACCION21, Miguel Mansur, a informa cu el a haci un peticion na presidente di Parlamento di Aruba, Edgard Vrolijk, pa yama un reunion urgente pa tuma luga dialuna 25 di maart.
E peticion aki tin di haber cu e ultimo acontecimentonan cu a sucede entre lider di fraccion RAIZ, Misha Raymond y presidente di Parlamento. Mansur a remarca cu a yama e reunion aki pa e comision CHA (Commissie Huishoudelijke Aangelegenheden) reuni cu urgencia pa establece si e presidente ainda ta conta cu sosten di un mayoria den parlamento.
Peticion pa e reunion urgente aki a bin despues cu diahuebs anochi durante un partijraad extraordinario di partido MEP diahuebs anochi na unda prome minister y su fraccion a vocifera nan compromiso cu procedura, algo cu, segun parlamentario Mansur ta remarca, nan ta viola sistematicamente sin pica.
Mansur ta subraya cu un presidente di parlamento no por sigui eherce su funcion si e no ta conta cu sosten di un mayoria den parlamento. El a señala cu actualmente no tin claridad si Vrolijk ta conta cu sosten di 11 parlamentario mirando e comunicacion entre su persona y e lider di fraccion RAIZ.
Mansur ta haci un peticion pa un reunion urgente di CHA pa dialuna 25 maart. E comision aki ta consisti di presidente (Edgard Vrolijk), lider di fraccion MEP (Hendrik Tevreden), lider di fraccion RAIZ (Misha Raymond), lider di fraccion di AVP (Mike Eman), lider di fraccion di MAS (Marisol Tromp), lider di fraccion di ACCION21 (Miguel Mansur) y miembronan independiente Santos do Nascimento y Croes.
“Sin ningun berguensa nos a mira cantidad di presupuesto pasa sin nunca bay comision y awor
nan kier pretende cu tur concepto di ley mester bay comision y ta unicamente ora e respectivo presidente di un comision concerni duna OK. un reunion por wordo yama. Pa purba disimula,
diabierna ultimo a core saca un invitacion pa diamars (dialuna tabata cera pa dia di himno y bandera) pa discuti den comision cambio na nos kiesverordening pero nan a lubida di invita Electorale Raad den nan apuro pa tapa nan gañamento,” Mansur a indica.
E lider di fraccion ACCION21 a resalta su admiracion pa lider di fraccion RAIZ pa para firme pa democracia y pa exigi pa parlamentarionan haci e trabao cu pueblo ta paga nan pa haci. “Denuncia abuso di poder di un presidente pa su metanan partidario tambe ta di aplaudi, si nos kier miho gobernacion parlamento mester cuminsa funciona como debe ser,” el a bisa referiendo na e accionnan cu parlamentario Raymond a tuma den e situacion andando cu presidente di parlamento.
E acontecimentonan entre lider di fraccion RAIZ, Raymond y presidente di Parlamento, Vrolijk, ta relaciona na e peticion di Raymond, pa varios luna caba, pa un reunion pa asina trata e ley di matrimonio di mesun sexo. Mirando cu ainda presidente di parlamento no a honra e peticion aki, Raymond a expresa su malcontento pa cu esaki y su opinion den un segundo carta dirigi na e presidente di parlamento.
Raymond, tin varios luna caba ta pidi presidente di parlamento pa yama un reunion pa asina por trata e ley di matrimonio di mesun sexo, cual ainda no a tuma luga. Relaciona cu esaki, diahuebs 21 di maart Raymond a manda un di dos carta pa presidente di parlamento.
Den e carta aki Raymond ta indica cu e presidente di parlamento den su carta di 19 di maart a bisa cu lo trata e ley aki durante e prome siman di februari 2024, pero esaki no a sucede.
“Mester keda cla cu e carta di 19 di maart di bo persona y e carta di 21 di februari di Guedez-Erasmus no ta duna confiansa cu e reunion publico ta premira pa tuma luga den un tempo cortico . Te awe, boso no a cumpli cu boso compromiso den e proceso aki. Bo a spera casi un luna pa duna un reaccion cortico riba e peticion, bo a rechasa e peticion rasonble, y te awe no tin ningun perspectiva oficial pa un tratamento oportuno di e proyecto di iniciativa,” Raymond a señala.
El a sigui indica cu e interes di partidonan ta conoci, pero cu parlamentarionan mester pone e interes general na prome luga. El a clarifica cu cada miembro di parlamento por vota na fabor of contra un proyecto sin ningun carga, of abstene di vota, y cu esey no ta e punto di e carta. El a resalta cu e punto ta cu no mester abusa di e presidencia di Parlamento di Aruba pa pospone e tratamento di un proyecto di iniciativa pa sirbi interes di un partido. “Esei ta deshonra pa un presidente. Mi ta spera, pues, cu bo no lo keda den esaki,” el a remarca.
Raymond a pidi pa un biaha mas, teniendo cuenta cu e importancia di e funcionamento di Parlamento di Aruba, y cu e cumplimento di e tareanan cu ta cay riba e parlamentarionan como representantenan di pueblo y legislador, pa establece un fecha pa e tratamento di e proyecto di ley pa habrimento di matrimonio, pues legalisacion di matrimonio pa parehanan di mesun sexo, y a pidi pa e reunion publico tuma luga den un tempo cortico.
Por ultimo el a indica cu despues di establece e fecha di tratamento, otro reunionnan di comision desea ainda por tuma luga, pero sin ningun posponemento. El a resalta cu e otro partnernan interesa den e asunto lo colabora cu nan presencia na e momento adecua, manera cu sa sucede mas cu un biaha den caso di otro proyectonan di ley. “Considerando e desaroyo di e proceso te awe, boso compromiso anterior, e accionnan di posponemento y e tempo extra caba brinda, mi ta considera e peticion aki manera un ultimo peticion rasonabel,” el a finalisa.
