Durante un reunion den sala di Parlamento dia 23 di mei 2022, Prome Minister Evelyn Wever-Croes a bin pidi sentimento di Parlamento pa loke ta e condicionnan cu Hulanda a mara na para e recorte di 12,6% riba salario de empleadonan publico.
Sala a duna di conoce su sentimentonan, incluyendo nos di fraccion RAIZ.
Entre e condicionnan, kier mara Parlamento di antemano na aproba un concepto di ley (ontwerp-Landsverordening normering topinkomens) cu mester wordo trata ainda, mientras cu Parlamento mester por evalua e concepto di ley y eventualmente presenta amienda pa cambia esaki. Tambe ta pone como condicion cu e recorte riba salarionan di ministernan y parlamentarionan mester keda 25%, sin un splicacion debido.
Tene na cuenta cu segun nos constitucion parlamentarionan mester por dicidi y vota ‘zonder last’ (artikel III.16, lid 2, Staatsregeling van Aruba). Esaki ta netamente un punto cu fraccion di RAIZ a trece dilanti den nos remarcanan y preguntanan siman pasa riba e consensusrijkswet COHO.
Fraccion di RAIZ ta na fabor pa para e recorte riba salario di empleadonan publico. E recorte kisas tawata na su luga na su inicio, pero mientrastanto no tin hustificacion debido pa sigui corta e salarionan, tanten cu por financia esaki na un forma responsabel. Esaki ta un asunto interno di Aruba landsaangelegenheid) y no ta na su luga pa mara esaki di antemano door di Parlamento den un otro concepto di ley y recorte di 25% riba salario di parlamentarionan.
E pregunta cu a wordo haci na sala di Parlamento ta si nos ta di acuerdo cu e condicion pa sigui corta 25% pa parlamentarionan. Nos a vocifera cu tanten empleadonan publico ta solidario, nos di fraccion di RAIZ tambe ta solidario. Na momento cu empleadonan publico cuminsa recupera (parti di) nan salario bek, parlamentarionan tambe por cuminsa recupera (parti di) nan salario. Prome Minister a bin pidi sentimiento na sala di Parlamento pa por inclui esaki den e negociacionnan cu Hulanda. Fraccion di RAIZ ta keda para pa cuminsa para e recorte den salario pa empleadonan publico.
E sistema di purba goberna Aruba for di Den Haag, sin duna cuenta y por medio di mina e rol di Parlamento, ta creando un precedente negativo cu fraccion di RAIZ no ta di acuerdo cu ne. Asina por presiona Parlamento pa aproba (por ehempel) introduccion di BTW na un forma y tempo dicidi na Den Haag, of pa hisa edad di pensioen manera proponi den e landspakket, y mas. Esaki ta asuntonan interno di Aruba cu Parlamento mester por evalua, considera y adapta proposicionnan segun su rol constitucional, zonder last, y cu hustificacion debido.
Na momento cu nos ta hala principionan estatal un banda pa ehecuta condicionnan sin mas, nos ta atacha nos rol den Parlamento y cu esaki e democracia di nos pais.
