Misha Raymond (Raiz): AVP, MAS, y Accion21 ta faya pueblo y ta keda sin haci nan trabao durante tratamento di presupuesto 2023

Lider di AVP sr. Mike Eman y su fraccion, sigui pa parlamentarionan di MAS y Accion21, a dicidi di no participa den e tratamento di e ley pa presupuesto 2023. Mi lo splica pakico, den mi opinion, e escogencia di AVP, MAS y Accion21 pa no haci e trabao di trata un presupuesto, ta un fayo den direccion di pueblo, cu nos como parlamentario ta representa.

E concepto di ley pa presupuesto 2023 a wordo entrega na College Aruba financieel toezicht (CAft) y Raad van Advies (R.v.A.) na respectivamente juni y juli 2022. CAFT y Raad van Advies a duna conseho riba e concepto. E tempo ey, parti di e pronostico di entrada tawata basa riba introduccion di BTW. Mientrastanto gobierno a dicidi di no introduci BTW na 2023, y na luga di esey ta premira un aumento di BBO pa yega na un nivel di entrada similar. Segun lider di AVP Sr. Mike Eman, MAS y Accion21, gobierno mester a manda e concepto adapta pa CAft y Raad van Advies pa un di dos conseho, prome cu mand’e pa Parlamento.

Gobierno a contesta e peticion aki cu argumentacionnan huridico, incluyendo e insinuacion eroneo di AVP, MAS y Accion21 cu un conseho di CAft ta obligatorio den e fase en cuestion, y argumentonan relaciona cu e meta di un presupuesto y cumplimento cu nos Constitucion. Tambe a mustra riba e punto cu e tratamento di sea introduccion di BTW of un aumento di BBO ta tuma luga ora di trata e ley di introduccion di BTW of e ley pa aumenta BBO, y no ora di trata un presupuesto. No ta mi intencion pa haci esaki solamente un discusion huridico. Nos por sigui discuti si a pesar cu no tin un obligacion legal pa bolbe manda un concepto pa Raad van Advies bao di e circunstancianan aki, cu gobierno ta ‘liber’ pa haci esey. Of si huridicamente ta mas prudente pa manda un concepto adapta pa Raad van Advies ora a cambia e base di un parti di e pronostico di entradanan di un presupuesto. Loke si mi por bisa, ta cu como parlamentario bo tin e deber di eherce bo funcion y no core pa bo trabao paso bo no ta haya bo kier riba un proceso. Na momento cu Parlamento yega na e tratamento publico di e ley di presupuesto 2023, ta na nos como parlamentario pa eherce nos funcion di control, eherce nos budgetrecht, y tambe eherce e funcion di co-legislador, door di participa activamente na e tratamento publico di presupuesto 2023, haci pregunta, busca clarificacion, cuestiona e maneho, presenta solucion y vota sea pro of contra. Tambe por entrega amienda y mocion. Ademas por vota riba amienda y mocion entrega door di otro parlamentario.

Cu Raad van Advies a duna conseho riba un concepto cu un prognostico parcial basa riba BTW na luga di BBO, no ta significa cu un parlamentario no tin suficiente informacion pa trata un ley. Ironicamente, pa presupuesto 2022, fraccionnan di AVP y Accion21 a entrega un ‘presupuesto alternativo’ den forma di un amienda entrega pa votacion, sin haya pregunta, sin bay Caft y sin bay Raad van Advies.

Na luga di representa pueblo door di eherce e trabao parlamentario, AVP, MAS y Accion21 a dicidi di bandona sala ora di tratamento di e ley den reunion publico. Esaki no ta e manera cu pueblo ta wordo miho sirbi den su representacion den Parlamento. Cu un oposicion asina, un democracia no por funciona optimalmente. Excluyendo bo mes for di participacion y influencia como parlamentario, ta un falta di respet pa e voto di e ciudadano. Fraccion di RAIZ a prepara pa e tratamento di presupuesto. Nos a manda pregunta den e verslag di Staten, y lo participa activamente den e tratamento publico. Asina nos ta eherce e tarea di control, eherce parti di e budgetrecht, y nos funcion como co-legislador, representando e pueblo di Aruba.