Diahuebs ultimo, 28 di maart 2024 lider di fraccion RAIZ, parlamentario Misha Raymond hunto cu su colega Raymond Kamperveen, a tene un conferencia di prensa ariba e topico di matrimonio pa pareha di mesun sexo. Durante e conferencia, Raymond a duna un splicacion mas amplio ariba e trayecto cu e ley di concepto aki a cana y a anuncia cu finalmente a ricibi un fecha pa tene reunion publico pa asina trata e ley aki den Parlamento di Aruba.

Raymond a splica cu e trayecto a cuminsa dia 16 di december 2022, ora cu e ley di iniciativa a wordo entrega. Pa dia 15 di februari 2023 Raad van Advies a duna su conseho riba e concepto di ley y manera ta conoci, dia 24 di februari 2023 gobierno a bay den casacion.

Na e momento aki, e parlamentario a indica, a haci un acuerdo cual ta bisa cu Gobierno di Aruba a bay den casacion, pero no ta stroba e caminda di e ley aki pa loke ta parlamento. Den luna di mei 2023 e concepto di ley ta yega parlamento y den luna di juni e informe pa pregunta ta wordo entrega.

Parlamentario Raymond remarca cu a bin cu mas di 400 pregunta cu e iniciadornan di e ley aki mester a contesta. El a agrega cu ora cu a bay sala di parlamento confirma cuanto siman tur parlamentario ta haya pa haci pregunta pa loke ta trata e ley, fraccion di MEP a expresa cu nan kier warda casacion. Tur otro fraccion, incluyendo RAIZ, a bisa cu no kier warda casacion pa trata e ley di matrimonio pa pareha di mesun sexo.

Lider di fraccion RAIZ a sigui splica cu dia 9 di october 2023 e ley tabata cla pa wordo trata y na e momento ey tambe a cuminsa yama e reunionnan den comision y riba dianan 11, 18 y 31 di october tres reunion den comision a wordo yama den e comision di Bida, Famia y Asuntonan di Adulto Mayor.

Riba dia 8 di november 2023, Raymond a indica, e mes a yama un reunion den comision cu un psicologo pa splica e proceso di kico esaki por nifica y dia 16 di november pastor Garcia a bin den sala di parlamento tambe pa papia di su opinion.

Parlamentario Raymond a agrega cu den luna di november 2023 como iniciador di e ley aki el a palabra cu presidente di parlamento cu e ta duna colega di parlamentario Darlaine Guedez-Erasmus, presidente di e comision Bida, Famia y Asuntonan di Adulto Mayor pa yama su reunionnan y cu den luna di februari ta trata e ley di matrimonio pa pareha di mesun sexo.

Despues di esaki, e siguiente reunion a tuma lugar 16 di januari unda Wit Gele Kruis tabata presente. Raymond a remarca cu durante e reunion no a papia di e ley aki. Dia 29 di februari, 5 siman despues, Stichting ADRA a bin papia di e tema. El a indica cu durante e reunion aki tambe el a vocifera y bisa cu no tabata duidleijk, y cu no a wordo comenta den e invitacion, cu e stichting ta bin papia di e ley aki.

Parlamentario Raymond a resalta cu colega parlamentario di fraccion MAS, Aquannette Gunn a peticiona durante e mesun reunion aki pa e presidente di comision, Guedez-Erasmus, duna un lista actualisa tocante kico tur ta e reunionnan cu mester tuma lugar, ken tur mester bin pa asina nan por tin un indicacion con tur esaki ta canando. Raymond a sostene e peticion aki.

Den luna di feburari, prome cu e reunion cu Stichting ADRA a tuma lugar, parlamentario Raymond a manda un carta pa presidente di parlamento pidiendo pa un fecha pa reunion pa trata el ey di matrimonio pa pareha di mesun sexo. Presidente di parlamento a contesta e carta aki den luna di maart indicando cu nan ta bay warda pa parlamentario Guedez-Erasmus caba cu su reunion di comision prome cu yama e reunion pa trata e ley, algo cu segun presidente di parlamento ta procedura di parlamento.

Raymond a remarca cu e procedura aki no ta conoci ni pa su persona, ni pa su colega ni demas coleganan den parlamento.

 

Dia 21 di maart e lider di fraccion RAIZ a manda su ultimo peticion na presidente di parlamento y den e carta aki el a expresa tambe kico e ta pensa ta tumando lugar y pakico e ley aki no a wordo yama ainda.

“Mi a bisa den e carta cu mi ta spera cu mi por conta cu e presidente no haci e tipo di cosnan aki pa nos tur por conta cu con democracia tin cu funciona den parlamento y cu nos por spera un fecha di reunion,”

Raymond a informa cu diaranson 27 di maart, un dia prome cu e conferencia di prensa a tuma lugar, RAIZ a ricibi un carta for di presidente di parlamento y den e carta ta bisa cu dia 8 di mei 2024 ta bay tuma lugar e reunion publico pa trata e ley di matrimonio pa pareha di mesun sexo.

E lider di fraccion RAIZ a subraya cu esaki ta momento cu e debate politico por tuma lugar, tur parlamentario por expresa nan mes, por bin cu nan puntonan, por expresa si nan ta na fabor y nan por bay votacion. “Esaki ta e momento cu mester tuma lugar,” el a enfatisa.

El a remarca cu casacion a stipula cu nan ta bay duna nan respuesta riba e caso dia 31 di mei, y nan ta contento cu dia 8 di mei no ta despues di casacion, pero mas cu tres siman prome pa asina por trata e ley aki den sala di parlamento.

“Nos ta papiando di hende, nos ta papiando di derecho di no wordo discrimina y e proceso no mester bay asina ki. E mester ta un proceso cu ta bay di tal forma cu nos ta duna honor na e derechonan cu nos ta bringando pe,” el a subraya.