Miriam Dabian kende ta directora di ATA Latino America a reflexiona riba e di 30 aniversario di e Conferencia Anual di Turismo Aruba (CATA). A pesar cu e aña aki e conferencia a bay den forma virtual, el a recorda cu semper nan a yega di ricibi nan socionan di Latino America cu un sonrisa y un ‘bonbini.’
El a laga sa cu a pesar di e situacion cu henter mundo ta pasando aden, CATA 2020 no lo bira un excepcion. “Pasobra aunke nos ta leu nos ta kere cu e miho forma di permanece uni ta e forma virtual,” Dabian a bisa. Y durante e conferencia aki nan a prepara un agenda special pa medio di un serie di video, entre nan relaciona cu e actualisacion di protocol nobo pa ricibi nos bishitantenan y tambe rekisitonan di entrada.
Igualmente nan a presenta e manifiesto nobo di e marca Aruba como parti di ATA su campaña di reapertura cu pronto lo wordo divulga riba diferente plataforma digital. Aunke actualmente nos frontera ta cera pa Latino America,pero e anuncio haci den e cuadro di e conferencia di CATA pa e companianan Avianca y COPA Airlines, pronto e operacion aereo gradual lo reestablece cu e region aki. Tambe pa medio di un forum virtual nan a presenta un perspectiva economico di e region Caribe y Latino America; y con turismo ta un factor fundamental pa e mehora economico di e region aki.
Den cada seccion di CATA nan ta bishita cada skina di e One Happy Island. Tambe nan a yega di participa y disfruta di varios presentacion di aliadonan clave di e industria aki. Tambe nan a comparti aprendisahe y idea.
Igualmente nan a crea aliansa y relacion comercial, pero principalmente nan a traha pa crea un espacio ‘memorabel y di famia.’ E intencion tras di esaki ta pa laga un experiencia feliz cerca nos bishitantenan y laga un señal pa e futuro di nos turismo.
