Mirando cu e discusion internacional ta otro; Parlamentario Sneek no sa si ley di financiamento politico ta bay yuda

Un biaha mas e debate a start rond si e ley di financiamento di partidonan politico, unabes cu e parlamentarionan Rocco Tjon y Edgard Vrolijk (MEP) a yega di introduci e ley di iniciativa na 2018, y awor e lo bay den tratamento.

Segun parlamentario y lider di e fraccion di oposicion, Marlon Sneek (AVP), e ley aki no ta nada nobo. Den pasado nan coleganan di fraccion, a yega di presenta un iniciativa di ley riba financiamento di partido politico.

Ex-parlamentario Donny Rasmijn a bin cu un ley di e mesun caliber. Segun parlamentario Sneek, e ley aki no ta bay trece mucho cos nobo. No solamente tabatin e concepto di ley di ex parlamentario Rasmijn. Sino cu ex-parlamentario Chris Dammers a traha otro iniciativa di ley pa estado financia partido politico basa riba nan asientonan den parlamento. Of si nan tin den nan partido fundacion cientifico cu ta haci cierto investigacion riba diferente tereno of problematica pa asina haya financiamento. Segun Sneek esaki tabata e discusion cu tabatin e tempo aya pa evalua e miho concepto.

E ta haya cu awe den comparacion cu antes, cada candidatonan riba lista di partido politico tin su fundacion. Kiermen basa na nan fundacion, tur cos ta registra den nan cuenta anual, caminda tur hende por mira e cifranan. Parlamentario Sneek ta kere cu e biaha aki e mester bira mas structura, caminda e cifra mester wordo manda pa un comision cu ta wordo institui. E no sa si e ta wordo institui directamente dor di Conseho Electoral of si e ta un comision nobo cu lo bini.

El a indica cu awe nos por conoce ministernan cu a haya un cantidad di sponsor cu nan no ta skirbi niun caminda, pero nan a haya e recurso aki den forma di material. Pues e ta kere cu ora cu e momento yega pa debati riba e ley, nan lo trece tur e puntonan aki dilanti, y con pa hinca e ley aki den otro.

E ley aki ta existi na Corsou y na St. Maarten caba, sinembargo nos por mira e situacion den e paisnan aki. P’esey parlamentario Sneek no sa si di berdad e ley aki ta bay yuda. Pasobra e discusion ta otro riba plataforma internacional. El a referi na Parlatino cu den nan comision politico nan ta discutiendo pa estado mes (gobierno) financia partidonan politico.

Sneek ta haya cu e discusion riba e topico aki no tin di haci cu financiamento di partido politico cu placa sushi of ilicito pa labamento di placa. E discusion actual ta draai riba cu e hendenan cu tin poder economico ta financia partidonan cu diferente suma, y nan no ta worry si nan nomber ta aparece.

Pero e punto di preocupacion ta cu e hendenan aki por tin influencia despues riba un gobernacion. P’esey e discusion mundial ta pa partido politico ta wordo financia via estado pa evita sponsor of donacion cu ta bin di algun caminda, y despues por tin efecto riba bon gobernacion.