Minister di Salubridad Publico, Dangui Oduber a informa cu Merca a bira un opcion pa manda e pashentnan di AZV cu mester di atencion medico den exterior. Nan a bin cu e opcion aki, ora cu Colombia a anuncia cu ta cera su frontera pa tur persona cu ta bin for di exterior, sin excepcion.
E minister en cuestion a cualifica e decision aki como un golpi duro pa nos, ya cu Colombia ta nos proveedor principal di cuido di salud pa e aseguradonan di AZV. Aruba ta manda mensualmente entre 100 pa 150 pashent pa Colombia pa tratamento medico. Nan a haci esfuerso na nivel diplomatico halto pa haya un excepcion for di gobierno di Colombia, pero no tabata posibel.
E mandatario a bisa cu esfuerso diplomatico a wordo haci y te hasta directamente el a logra papia cu Secretario di Salud di Merca, Alex Azar -kende el a yega di conoce den pasado- pa facilita cu e pashentnan di Aruba por wordo manda pa dos institucion di salud na Miami, Florida. Logicamente e pashentnan cu lo wordo manda no mester ta contagia cu coronavirus.
E opcion aki lo keda habri, te ora cu gobierno Mericano di presidente Donald Trump no ta dicidi di cera su frontera totalmente. Sinembargo mirando e desaroyo cu ta tumando luga den henter mundo, ta existi e posibilidad cu Merca lo cera su frontera tambe.
P’esey gobierno di Aruba pa medio di AZV ta sigui explora otro destinacion, entre nan Costa Rica, pa manda e pashentnan di AZV cu mester di cuido medico den exterior, asina minister Oduber a laga sa.
