Un siman despues cu Minister Presidente, Evelyn Wever-Croes a informa brevemente cu a yega di combersa cu tanto dirigente di partido POR y tambe cu minister Marisol Lopez-Tromp, pa ambos partido dialoga y purba di resolve nan diferencia, no tin mas detaye riba e situacion aki.
“Basicamente nos ta den e mesun luga,” e mandatario a bisa contestando pregunta di Bon Dia Aruba.
Despues cu el a pidi ambos partido pa dialoga y purba di sali afo, ya cu actualmente – segun e mandatario– nos pais ta den crisis, y nos no mester aworaki di un crisis politico. Tin dialogo cu ta tumando luga den seno di partido POR pa atende cu e crisis interno aki. Esaki a surgi ora cu lider di e partido, Andin Bikker a pidi renuncia di nan miembro y minister Lopez-Tromp no mas tarda cu 10or di mainta di dia 8 di juni pasa.
Premier Wever-Croes a bisa cu e no a haya un update ainda di e proceso di dialogo aki. E ta spera cu e siman aki gobierno por haya sa con leu e diferencia entre ambos partido ta actualmente.
