Minister Presidente Evelyn Wever-Croes no ta kere cu loke ta para den articulo 33 di e ley di Rft (Rijkswet Financieel Toezicht), riba con largo e supervision financiero di Hulanda lo ta pa Aruba den e regimen nobo aki, lo trece mucho cambio riba situacion actual. Segun nan calculacion e no ta desvia mucho di locual tabata nos realidad cu LAft (Landsverordening Financieel Toezicht.)
Articulo 33 di Rft ta bisa cu cada 5 aña lo tabatin un evaluacion, y despues cada tres aña. Minister Presidente ta indica cu e duracion di un regimen di supervision financiero asina ta algo di 7 aña kiermen te 2027. Nan ta e periodo di añanan cu -segun Hulanda su expertonan- nan ta mira cu pais Aruba lo ta saliendo di e crisis actual.
Prome Mandatario tabata mas optimista, y e ta spera cu den tres aña Aruba por lanta bek. Alomenos pa nos por yega na e nivel bek prome cu e virus a bati nos porta. Esaki si tur cos ta bay bon na caminda. Sinembargo encuanto e aceptacion di Rft y con largo e regimen aki lo por resulta pa Aruba por haya su maneho financiero bek, como parti esencial di su autonomia, ta un punto cu nan mester evalua.
Ta asina cu un di e condicionnan cu Hulanda a bin cune pa sigui otorga fiansa na cero interes pa pais Aruba por sigui cumpli cu su compromisonan, ta compromete gobierno pa acepta un cambio di regimen fiscal. Rft ta un ley di reino cu ta existi na Corsou y St. Maarten. E decision di e embergadura aki mester cay prome cu diabierna awor cu lo tuma luga e reunion di conseho di minister di Reino.
Segun prome minister. Evelyn Wever-Croes no ta cuestion cu Aruba a perde autonomia. E ta haya cu autonomia a bay perdi desde prome instante cu gobierno anterior a acepta supervision financiero di Hulanda na 2014/15 pa medio di un protocol.
Tambe el a haci e ehercicio di pone e ley di Reino di Rft banda di nos ley nacional LAft, y e no ta weita mucho diferencia. P’esey e prome mandatario a afirma cu entrega di autonomia a tuma luga caba na 2014/15.
El a argumenta cu den e ley di LAft cu ta institui e organo di supervision CAft, gobierno anterior a yega na palabracion cu Hulanda, cu solamente conseho di minister di Reino ta duna e ultimo palabra pa por cambia e ley aki. Mientras cu Rft ta un ley di Reino, y conseho di minister di Reino tin e ultimo palabra. “Kiermen no tin mucho diferencia den esey,” segun e prome mandatario.
El a splica cu LAft ta un ley di nos Parlamento, pero nos organo legislativo por cambi’e of bin cu amienda cuanto cu nan kier, pero si conseho di minister no ta duna aprobacion tur cos ta keda mescos. Esaki ta e hecho cu a sosode aña pasa, caminda Parlamento a bin cu cambio y te ainda e cambio no por a wordo ehecuta debi cu conseho di minister di Reino no a aprob’e.
A pesar di e supervision financiero di Hulanda, e mandatario a argumenta cu tur cos tabata bayendo bon pa sali for di e crisis presupuestario. Pero e crisis di Covid a dal nos, y segun expertonan financiero di varios instancia local y internacional, Aruba ta bay tarda hopi aña prome cu nos por ta riba nos pia bek.
