Na mes momento cu ministro encarga cu husticia, sr. Rocco Tjon, a declara na prensa cu no tin problema pa sigui traha cu cu e compania SADI S.A.S. den operacion di e helicopter na Aruba, pasobra e persona cu a entrega su mes na autoridad hudicialMericano no tin relacion mas cu e compania, noticia for di Colombia lo ta indica cu no ta solamente e persona cu tabata liga na e compania, Carlos Restrepo Osorio , ta den luz investigativo, sino e compania mes tambe.

Ta trata di dos tema vincula, esta e sospecha di participacion di e compania den transporte di droga, y servicionan di transporte presta na campaña presidencial di actual presidente Colombiano, Gustavo Petro.

Segun medionan Colombiano, entre otro Agencia Periodismo Investigativo, e compania aereo ta envolvi den un denuncia haci contra actual ministro di salud, Guillermo Alfonso Jaramillo, ken lo a facilita transporte na varios candidato di Pacto Historico, “usando avion perteneciente na Carlos Eduardo Restrepo Osorio, alias “Caco” y su empresa Sociedad Aérea de Ibagué Sadi S.A.S.” E denuncia a ser haci pa Hernan David, representante di Centro Democratico den Congreso.

Di parti di e sospechoso deteni na Merca, Restrepo Osorio, a bin un comunicado di prensa unda e ta declara cu e no ta vincula cu e compania SADI desde januari 2019, “ni como socio, ni como accionista, ni como representante legal o gerente di e compania ey”. Su declaracion ta parce relaciona cu su intento pa no ta envolvi den e actual problemanan cu e compania tin, unda tin un investigacion andando di Conseho Nacional Electoral (CNE) tocante e envolvimento di e empresa den posible uso y traspaso di fondo ilicito den campaña electoral na 2022, na fabor di actual presidente Colombiano y su partido.

E publicacionnan na Colombia ta pone un luz diferente y negativo riba e compania mes, unda inicialmente e atencion tabata bay den direccion di e persona Restrepo. Esaki ta laga algun interogante pa e operacion di e compania aki na Aruba, hunto cu autoridadnan hudicial, entre nan cuerpo policial. E declaracionnan haci te na e momento aki di parti di ministerio di husticia no a clarifica tur aspecto. Entre otro a keda e pregunta ta ki tipo di background check a haci den cuadro di e destaho publico a base di cual lo mester a scoge un operador di helicopter. Ademas no tabatin accion tampoco, tempo cu na 2021 e compania a bin bao di sospecha na Colombia pa e transporte di cocaina cu a keda confisca na Providencia. Tambe lo ta bon pa clarifica ta ken tabata e representante di e compania SADI, cu finalmente a firma e contrato cu gobierno di Aruba.

Di tur manera ta keda straño cu ministro di husticia ta declara cu no tin nada problematico andando cu e compania, mientras cualkier confirmacion positivo Colombiano lo mester bin di gobierno di Petro, cu ta hustamente bao di investigacion di CNE, pa corupcion hunto cu e compania aki. Si esaki mester ta e partner di un gobierno cu tin integridad y transparencia como lema principal, ta imaginable cu por tin duda den e aparato hudicial pa mester colabora cu e compania, tanten e caso na Colombia no keda resolvi.