Ayera hues den casonan di ambtenaar a duna su veredicto den e caso di director di departamento di Salubridad Publico (Directie Volksgezondheid; DVG) contra ministro encarga cu Salubridad Publico. E director a apela e decision di e mandatario, cu pa di tres biaha sigui tabata kier a extende e periodo di 12 siman, den cual e director lo mester a haci otro tarea na lugar di esun di director. Hues a haya ta basta y a ordena pa e director reanuda su trabao inmediatamente.

No cu esey ta significa e fin di e guera, al contrario. Durante e caso abogado di e mandatario a anuncia cu porfin e rapport di Departamento di Recurso Humano (DRH) a keda cla (dia 12 di april 2019) y cu ta pensa pa actua segun e conclusion di e rapport. Segun e abogado di ministro, DRH ta haya cu e director no ta apto pa e funcion y cu mester tuma un decison pa remove e persona definitivamente di e puesto, pero cu e mandatario mester di tempo pa busca un otro puesto adecua pa manda e funcionario publico bay haci esey. Hues a haya cu ta exactamente esey ta loke mester sucede: bay actua y stop di usa un medida temporal pa tanto tempo mas ainda, sin cu ta duna claridad… Loke nos ta bay haya proximamente anto ta cu e ministro por bay haci loke e tabatin pensa di haci pa basta tempo caba, y esey ta kita e persona aki, cu obviamente no ta di su agrado, for di e puesto. Kico exactamente ta bay pasa, esey nos lo haya sa pronto den e siguiente episodio di e novela aki, suponiendo cu lo cuminsa caso den corte atrobe, sea cual sea e decision.

Sin embargo, e caso aki tambe ta pone nos pensa si e cosnan aki no por bay di otro manera. Mester ta posible pa maneha e cosnan aki di un manera mas diligente, y no laga e asunto ‘drag on’ pa practicamente un aña… Pregunta cu ta surgi por ehemplo ta si di berdad e departamento di Recurso Humano mester tuma como un aña pa traha un rapport tocante funcionamento di un director? Acaso nan a papia cinco biaha cu cada empleado? Y di berdad bo mester a haci un ‘doorlichting’ di e departamento completo aki, pa bo haya sa si e director ta funciona si of no? No ta bira tempo pa duna e departamento di Recurso Humano mes e tal ‘doorlichting’ ey pa analisa si nan ta funciona na un manera adecua? Si bo bay puntra mayoria di empleado publico, probablemente nan lo bisa cu e departamento aki mes no ta cumpli cu ningun criterio di calidad… Entrega un rapport tocante funcionamento di un persona despues di 11 luna ta suficiente prueba di esaki.

Pero tin mas asunto cu ta irita nos den e asunto aki, sin cu necesariamente nos ta apoya e director den su caso, pasobra nos no sa, despues di un aña, ta kico tur el a haci malo. Ohala cu e famoso rapport por trece un poco mas claridad den e caso. Pero nos tin un pregunta den esaki: ta acaso normal awendia cu empleado publico ta hiba bataya cu nan superiornan den medionan digital? Y si nan ta hacie, ta hustifica, pakico? Acaso a atende e banda aki tambe di e storia, of ta e director ta e unico cu a haci algo robez? Por ta cu no tin canalnan interno pa canalisa keho y obhecion di empleado na un manera debido? Y con e situacion ta awor? Segun e abogado di e mandatario tin e temor cu e reaparicion di e director na trabao lo stroba e bon ambiente cu aparentemente tin awor… pero hues no a haci caso di esey.

Otro asunto, cu no ta toca solamente e departamento aki, sino varios: e fenomeno di ‘management team’. A bira un custumber di varios aña caba, cu unda un director no ta funciona, o al menos esey nan ta bisa, ta core hala e persona un banda y ta bin cu un management team… Bon, si nos ta hala un persona un banda y ta pone tres na su lugar, di berdad miho e formula ey funciona, pasobra diripiente e gasto di salario a pasa di 120.000 florin pa bira tres biaha e suma ey…pa haci e mesun trabao? Eficiencia nan ta yama esey? Y si en berdad cos ta opera miho, esey ta pasobra e director su so tabatin demasiado trabao, cu awor a keda reparti entre dos o tres persona, of di berdad e director no tabata sirbi? Pasobra si e no tabata sirbi, anto pone un drechi na su lugar, envez di crea mas puesto pa hendenan cerca di e partido di tal o cual ministro, pasobra esey e ta mas tanto.

Contal cu den e caso aki tambe nos ta mira kico ta pasa ora no ta actua na tempo: en principio e medida tuma pa e ministro no tabata mal pensa y ademas segun ley: e por duna e empleado publico temporalmente otro tarea. Pero ta tarda pa termina e proceso y bo ta bay hues pa haya golpi… esey ta pa siña actua na tempo.