Den un carta fecha 11 di mei 2020 ministro encarga cu enseñansa, dr. Rudy Lampe a informa e docentenan di Colegio San Nicolas di e cambionan cu ta spera nan, despues di su decision cu entrante 1 di augustus 2020 e scol ta bay cay bao di un maneho conhunto di Stichting Onderwijs Combina y un representante di e mandatario concerni, pa prepara e transicion pa otro aña per 1 di augustus e scol pasa completamente bao maneho di e fundacion aki, cu ta opera entre otro Schakel College, cu ta duna oportunidad pa Havo.

Den e carta basicamente ta ripiti e argumentonan cu el a vocifera tambe den un video riba su pagina di Facebook, unda principalmente e ta bisa cu nada no ta bay cambia pa e docentenan. Nan ta keda haya e mesun salario for di gobierno, e scol ta mantene su caracter publico. E unico cos cu ta cambia segun e mandatario, ta e ‘bevoegd gezag’ cu ta cambia di Gobernador pa e fundacion menciona.

Bon mira, esey ta un cambio esencial den ‘rechtspositie’ di e personal docente. Awor ainda nan ta ambtenaar/arbeidscontractant pa ken Gobernador ta ‘bevoegd gezag’ y entrante augustus 2021 esey no lo ta asina mas. Nos ta puntra nos mes ta con e mandatario kier logra e cambio aki, pasobra esey no ta parce nos posible sin mas. Esey por bira posible si logra cu e personal ta dispuesto di firma contrato nobo cu e fundacion, aceptando e ora e fundacion como ‘bevoegd gezag’ cu ta nombra, suspende y retira. Nos no a tende ningun momento durante e discurso di e mandatario cu e lo kier hiba e asunto asina leu, al contrario, segun e nada no ta cambia. Es decir, punto importante pa e mandatario clarifica.

Tambe e mandatario ta splica den su carta cu nada lo cambia tampoco pa e alumnonan, aunke pa loke ta e schoolgeld e ta bisa textualmente “zullen geen noemenswaardige verandering merken voor wat betreft het schoolgeld”. Esey por ta asina den su pensamento, cu lo tin cambio chikito so, pero si e fundacion ta autonomo pa busca otro financiamento, manera e ministro ta splica, nan ta autonomo tambe pa aumenta e contribucion cu nan ta pidi di mayornan di e alumnonan.

Finalmente, pa loke ta e fecha di e carta, ta remarcable cu e carta a sali riba mesun dia (11 di mei 2020) cu a sali un articulo den Bon Dia Aruba tocante e decision di e mandatario encuanto traspaso di e scol aki. Casualidad? Nos ta duda, pasobra e articulo a ser poni riba pagina di Facebook di Bon Dia Aruba e nochi anterior, di 10 di mei, y a haya centenares di likes den cuestion di algun ora.

E pregunta ta si e docentenan lo a haya un carta tocante un decision concretisa pa basta tempo caba, sin cu nan a haya tende di e decision final, si no tabatin publicidad di esaki. No un bon ehemplo di practica transparencia, segun nos opinion.