Ministro ta duna comercio regalo bieu

Ministro encarga cu Asunto Economico a duna di conoce cu desde varios aña caba ta existi e posibilidad di mantene un tienda habri te despues di e ora stipula den ley, cual ta 18:30. Ta existi e posibilidad pa keda habri te maximalmente 12or di anochi, algo cu ta existi pa tur area na Aruba, cu excepcion di esunnan cu tin un regimen special manera e hotelnan. Esun cu ta desea di keda habri mas laat, por entrega un peticion pa esaki. Anteriormente tabata cobra un suma pa haci e excepcion aki, pero desde 2011 esaki a keda elimina y ta paga solamente un suma chikito pa haya e documento.

Aunke ta bon cu e ministro ta mustra riba e posibilidad aki, e no lo resulta un ‘game changer’ den e problemanan cu tin cu e tiendanan den Caya Grandi. Ta berdad cu si Caya Grandi mester cambia di caracter pa por ta competitivo, e tiendanan o en todo caso un gran parti di nan, lo mester ta habri den oranan di anochi. Pero esey no ta bay sucede sin mas, sino e lo a sucede caba.

Pa cuminsa tin e problema di aumento di gasto pa e tiendanan, si nan ta keda habri mas ora, pero sin por anticipa aumento di nan volumen di benta. Esaki ta no solamente gasto di salario, sino tambe gasto di electricidad etc. relaciona cu e orario extendi. E otro punto clave den henter e asunto aki ta cu e hecho cu tin tienda habri te mas laat anochi riba su mes no ta atrae publico pa bin den caya na e oranan ey.

Loke ta haci falta, y esey ta algo historico, ta duna contesta na e pregunta con ta haya otro tipo di negoshi establece den Caya. Nos ta papia concretamente di mas ‘horeca’, mas diversion (nocturno) den forma di bar y restaurant – cu terasa – cu lo duna e caya un aspectocompletamente diferente. Mester constata cu nunca nos a yega di tende e planificadonan di Infrastructura, si acaso nan tin, papia di un acercamento asina di e problema di Caya Grandi.

Mester bisa tambe cu ta net e aspectonan aki tabata punto fuerte den e modelo cu empresario Raoul Henriquez a presenta varios aña pasa. Den su concepto tabatin entre otro e puntonan fuerte di atende e problema di sombra, e escogencia pa un area completamente pa peaton, y e creacion di bar/restaurant cu terasa, utilisando e espacio pa esey. Loke nos tin actualmente, despues di añanan di experimenta sin un meta fiho estableci, gastando miyones bao guia di un compania cu ningun hende no sa di unda el a surgi, na luga di duna companianan cu experiencia riba e tereno aki e beneficio di duda, ta un Caya unda no tin ‘overzicht’, un area largo corta na dos pa duna prioridad na e tram y no na e peaton, sin sombra di calidad y sin algo di haci den oranan di anochi.

Mester constata cu e problema primordial di Caya Grandi ta cu, pa scapa cara politicamente, no ta posibel reconoce awor cu a comete erornan grandi. Principalmente pasobra no a tuma na cuenta desde inicio e reglanan basico di reactivacion di un centro economico urbano. Nos no ta e prome pais na mundo cu a haya e tarea di rebiba su centro economico y pa tur aspecto problematico cu nos por a topa, tin un sin fin di ehemplo na otro parti di mundo di cual nos por a siña con pa soluciona nan. Sin embargo, esey ta exigi cu mester bin un cambio den e forma di traha.

E modelo cu practicamente tur mandatario na Aruba ta utilisa, di rondona nan mes cu ‘hende di confiansa’ y ignora e resto di comunidad y principalmente esunnan cu capacidad profesional y experiencia pa duna critica constructivo, ta haci cu automaticamente esaki ta hiba na un manera di traha ‘den secreto’ unda nan no tin molester di critica. Laga esnan cu no gusta bay corant of radio, nos ‘team di hende di confiansa’ ta dal bay pasobra ‘ta nos lo sa kico ta bon’. E resultado di e ‘approach’ eroneo awe ta bisto pa tur hende: propietario di edificio y doño di tienda malcontento, un publico cu a busca otro caminda di bay shop y diberti, un ‘team di hende di confiansa’ frustra pasobra e publico no ta comprende nan plannan fantastico (o fantasma) y finalmente un gobierno cu ta haya cu nan a haci basta caba, ‘awor ta turno na e comerciantenan pahaci algo’, algo cu textualmente a ser bisa asina pa nos Prome Ministro.

Na cierto ocasion por a sinti cierto desacuerdo y frustracion den su declaracionnan publico, unda el a duna e  impresion cu pa e trabao haci e ta haya finalmente ‘stank voor dank’. Di cierto manera por comprende su sentimento, pero esey no ta kita cu como ciudadano nos tambe por sinti nos frustra cu e resultado final di tanto inversion costoso pa yega na un resultado asina mediocre. Al final de cuentas, no ta placa di sr. Eman a bay benta afo, pero esun di nos.