Den rueda di prensa ayera mainta ministro encarga cu Infrastructura, Desaroyo Teritorial y Medio Ambiente, Otmar Oduber (POR), riba pregunta di prensa a confirma e noticia cu a sali caba den algun medio cu e compania cu ta desea di desaroya e proyecto hotelero na Sero Colorado, Three Rivers Real Estate N.V., a pasa e screening haci pa Veilgheidsdienst Aruba (VDA).
Recientemente a surgi duda encuanto e compania, su accionistanan y e compania(nan) cu lo ta provee e capital cu lo bay inverti, pa loke ta e origen di e capital aki. Bon Dia Aruba dia 14 di maart a publica informacion tocante e compania y e proveedor anuncia di e capital, Connected Capital na Londres. Banco Central den e dianan despues a manda un carta confidencial pa e banconan comercial pa adverti nan pa ta cauteloso cu e asunto aki, y haci nan ‘due diligence’ manera rekeri pa ley. Algun tempo despues e carta a leak den prensa local y a causa cierto sensacion.
Gobierno a considera prudente pa pidi VDA pa efectua un screening riba e compania y e inversionistanan tras di e proyecto. Y gobierno awor por anuncia cu e screening a bay bon, loke ta habri e posibilidad pa e proximo pasonan den e proceso pa yega na inicio di construccion di e hotel.
Ministro Oduber a conta cu a haya e resultado di investigacion dos siman pasa y despues prome minister a dirigi un carta na Banco Central pa informa cu e screening a tuma luga y no a trece nada negativo pa loke ta trata e grupo aki. Proximo paso lo ta pa Banco Central emiti un permiso di divisa pa por importa placa pa e proyecto aki. Despues lo sigui e proceso di ‘due diligence di e banco(nan) comercial cu ta desea di acepta e cliente aki.
