E actuacion di e ministro encarga cu Asunto Economico, Energia, Telecomunicacion y Medio Ambiente tabata esun mas mediocre di esnan cu a actua den parlamento te awor den tratamento di presupuesto. Pa cuminsa den su turnonan pa papia e tabata omiti di contesta varios pregunta, obligando oposicion pa cord’e den segunda tanda pa duna un contesta, manera e stipulacionnan legal al caso ta exigi.
Despues el a haya necesario pa arma un berinche tocante un supuesto acusacion di un parlamentario di oposicion cu lo a tilda e gerencia y trahadonan di e compania cu ta prepara pa produci gas di desperdicio pa nos planta di awa y electricidad di actonan criminal. Un hende mester ta basta desorienta pa desvia den semehante conducta, sigur si bo ta un ministro di un pais. Aparentemente nos yamado pa nan siña di nan mes colega cu si sa con pa comporta su mes no a yega na su oido.
Aparte di esaki e ministro a briya pa su referencia na e frase “mi ta bezig” of “nos ta bezig”. Despues di un rato cu tanto ripiticion di esaki e ta duna gana di hari, pero ta duna muestra cu nada no ta cla y e no sa ki dia tampoco. E caso mas discuti den esaki tabata e debate riba e situacion na dump, unda nos a comprende cu e ‘ta bezig’. Bueno, por lo menos e habitantenan di e bario por ta contento cu ‘e ta bezig’, nan mes por bay puntra ta te ki dia e estado di actividad desconoci ey lo dura. Loke nos por saca como conclusion cu pa hopi tempo no tabatin un plan kico haci cu e dump, pasobra tabata conta cu e plan di gasificacion na otro banda di caminda lo sirbi como pantaya pa tapa tur cos y kita atencion di e problema real di e dump, mas e problema creciente di e cincuenta dumpnan ilegal cu nos isla ta conta mientras tanto.
E observacion mas increibel cu nos a tende ta cu e ministro a keha cu e temponan aya e hendenan no tabata haci tanto druk ora ta trata di molester di e dump of e refineria… Por ta cu e ministro no a pasa den e experiencia di mayoria di ciudadano cu sa cu mundo a evoluciona! En berdad cuarenta aña pasa ningun hende no tabata maha ora e refineria tabata tur hende marea, igualmente e problema na dump. Tambe no tabata existi e leynan ambiental cu tin awendia riba nivel internacional y den hopi pais, menos Aruba naturalmente, pero cu nos lo mester bay respeta algun dia.
No ta esaki ta e mesun ministro cu a core cera un deal cu Citgo y PDVSA sin preocupa pa bin cu leynan ambiental y hasta pone den e agreement cu e compania por haya compensacion pa daño y perhuicio ora bin cambio den legislacion cu ta costa nan placa? E storia aki no a caba ainda.
Tambe a dedica atencion atrobe na e asunto di ‘hedging’. E ministro ta bolbe bin cu su defensa cu e no tabata na altura y su hendenan di Utilities tampoco. Ken ta carga culpa anto ta esnan encarga cu gerencia di WEB. Wel, pa informa corectamente, esey tabata un decision di e Conseho di Supervision y no di e director so. Pero ta e director so mester a baha! E comisarionan cu tambe tabata responsabel tur a keda sinta! Pa colmo e ministro a duna instruccion na e accountant cu a haci investigacion den e caso pa no inclui e ministro y e gerencia di Utilities NV den nan investigacion… vaya transparencia!
Lamentablemente tabatin tambe topico cu no a bin dilanti. Manera e situacion den telecomunicacion, unda algun dia pasa e compania Digicel a divulga nan plan pa trece un otro cabel internacional na Aruba, pa por expande nan actividadnan. Kico ta e background di e asunto aki, unda e compania tin pensa di inverti por lo menos $ 50 miyon? Aparentemente e peticion tin mas di un aña caba riba desk di e ministro, pero no ta move. Den pasado otro compania a topa cu obstaculo grandi pa haya nan permisonan y den e caso aki ta parce cu e ta bay mesun rumbo.
Dos aspecto ta hunga un papel aki. Uno, ta imposibel pa defende e monopolio di SETAR NV te na morto. Dos, pa por expande economia, sigur den e direccion di e famoso ‘kenniseconomie’ cu e mesun gobierno aki ta propaganda, ta bon pa nos tin mas conectividad di internet.
Mirando e totalidad, e ministro ta duna e impresion cu e no a traha riba nada otro cu e refineria ultimamente. Esey por ta un merito, dependiendo di cual banda ta mira e asunto. Pero di otro banda no ta mira nada di un maneho integral di medio ambiente, ni di economia. Desde 2013 te awe e gremionan empresarial a keda di haya un plan general di desaroyo economico, pero no a mira nada. Asina tambe medidanan pa estimulo di empresa di tur tamaño por igual nunca a mira luz di dia. Pero no por culp’e: e ta ‘bezig’.
