ORANJESTAD – Diaranson mainta, durante un conferencia di prensa, Minister Otmar Oduber (POR) a papia tocante e carta cu Banco Central a manda pa e banconan comercial en conexion cu e proyecto di hotel na Sero Colorado, y e screening cu lo tuma luga riba e grupo di inversionista di banda di gobierno.

Segun e mandatario, Banco Central tin un rol pa cumpli cune. E screening cu ta tuma luga ora cu inversionista ta haci un peticion, cu ta encera un suma grandi di placa, mester un licencia pa importa e placa cu ta bin di exterior pa financia e proyecto.

Oduber a bisa cu e proceso ta bay via Banco Central, y den e caso aki, gobierno ta pone su rekisito. “Un carta di alerta a base di un articulo cu a sali den corant, ta locual ta poni den e carta. A base di esaki, un parlamentario a duna un intepretacion adicional, manera cu ta algo cu a bay robes.”

Sinembargo, e mandatario ta bisa cu tur otro proyecto cu ta miyonario ta haci investigacion di screening, nan ta warda e resultado, y e compania ta haya permiso pa por importa placa na Aruba pa haci inversion y forma parti di nos economia.

E ta agrega cu haci documentacion ta necesario, pero sin excepcion di grupo. E mandatario ta bisa cu gobierno ta zorg pa integridad y transparencia. “Mi mes persona a insisti pa haci e screening. E grupo a cumpli practicamente cu tur exigencia di DIP, solamente falta e parti financiero di e screening cu tin cu tuma luga di un forma responsabel.”

Oduber a bisa cu den tur su añanan den politica, el a traha pa bin cu proyecto di hotel pa San Nicolas. Despues di 40 aña cu tur gobierno anterior ta buscando pa haci esey posibel. E ta un chens pa nan desaroya San Nicolas. E ta bisa cu di parti di gobierno lo keda lucha ‘te ora mi wak e prome pida bloki poni pa e hotel cu San Nicolas merece’.

“No tin ningun hende cu por bisa cu San Nicolas no merece un desaroyo. Si tin un hende envolvi den algo cu no ta cuadra cu nos leynan, e ora e proyecto no ta tuma luga,” e mandatario a bisa.

Bon Dia Aruba a puntra e mandatario di kico e screening ta consisti y con legalmente gobierno ta mara na resultado di e screening. El a contesta cu legalmente Banco Central tin su tarea di haci.

“Den nos leynan nos no tin ningun base cu ta bisa cu nos no por haci screening; como gobierno nos ta haya cu na e momento aki e mester tuma luga. Y si e gobernante haya indicacion di instancianan envolvi den e screening cu tin prueba, cu tin hende cu ta envolvi den algo robes, e ora ta keda na nan consenshi si ta dicidi di sigui si of no cu e grupo aki,” el a bisa.

El a continua bisando cu si tin den cualkier grupo cu no ta actua segun ley of regla, e ora cualkier mandatario mester respeta su mes den su decision of mester tuma su retiro. Pa locual ta trata e screening, ‘ta warda trankil pa mira si nan ta cumpli cu tur cos’.

Sinembargo, e mandatario a remarca tocante un articulo cu a sali den Bon Dia Aruba, cu investigacion cu a hiba a base di un periodista di Venezuela cu ta skirbi riba un blog. “E periodista aki ta den prizon pa motibo di soborno, e ta cera pa cobra hende placa y si bo no dun’e, e ta skirbi algo malo di bo. Esey ta locual tin na e momento aki.”

Oduber kiermen cu mester ta precavido unda cu investigacion completo lo tuma luga y ta wardando resultado. Si resulta algo malo, automaticamente e no ta bay mas, te ainda e mandatario a bisa cu no tin indicacion di algo robes, ‘si no tin nada, ta continua cu e proyecto’.

E ta mira cu tin sorto di obstaculo pa e desaroyo pariba di brug. “Mi ta kere si cu mester ta cauteloso, suficiente sigur ora nos ta anda cu inversionista cu ta yuda desaroya nos economia, pero e periodista di e blog aki ta cera, e ta hole robes, pero aunke ta bon pa alerta minister, te dia di awe no tin alerta riba nada di e grupo aki,” e mandatario a finalisa.