Contrario na declaracion di Premier Eman
E gran sorpresa di diahuebs ultimo tabata e anuncio di Prome Ministro Mike Eman cu, despues di varios reunion silencioso entre su persona y ministro Oduber, y algun ministro mas, a yega na un entendimento completo y cu paz ta reina atrobe den e partido y e gabinete. El a anuncia tambe cu a acorda cu e fin di siman aki lo tin un ‘cumbre’ entre tur e ministronan pa acorda strategia di gobierno pa e tempo venidero.
Den un entrevista cu Tito Laclé na Power FM ayera merdia, ministro Oduber a duna su bista riba e acuerdo na cual a yega. E ta bisa cu en berdad tin un apertura, un base pa sigui papia, pero cu tur cos ta depende di e acuerdonan concreto cu por logra den e cumbre cu ta programa pa awe diasabra, y di cumplimento tambe di e acuerdo pa e puntonan cardinal cu el a trece dilanti. Riba pregunta si e acuerdo aki awor ta significa cu su carta na Gobernador no tin relevancia mas, el a declara cu e carta ta keda vigente. Esaki kier men cu e lo evalua e situacion despues pa mira si berdaderamente tin un cumplimento cu loke lo bay acorda, si tur cos bay bon, den e fin di siman aki. Ministro Oduber hasta a papia di un protocol cu mester ta firma prome cu papia definitivamente di un acuerdo permanente.
Cu esaki, ministro Oduber a duna di conoce cu en berdad tin un acuerdo provisional, un apertura, pero cu esaki lo mester haya su concretisacion den un acuerdo definitivo cu ta abarca y atende e puntonan cardinal cu el a deposita cerca Gobernador. Cu esaki tambe, ministro Oduber no a aplica e mesun tono di hubilo di su colega Prome Ministro Eman, cu a duna e impresion cu tur cos ta ‘koek en ei’ atrobe den seno di partido AVP y di e gabinete. Esey tin su logica tambe. Ta trata di asunto importante pa comunidad, cu no ta clarifica solamente papiando, pero cu mester keda acorda por escrito, y haya continuacion.
Ora ta papia maneho di sector turistico, ta papiando pan di cada dia di mayoria di nos. Pa añanan largo gobierno(nan) a traha cu legislacion deficiente riba e tereno aki, sin realmente yega na modernisacion di henter e pakete di ley cu ta afecta funcionamento di e sector primordial aki. Banda di esey, e tiki legislacion cu tin, a ser ignora pa e gobierno aki, mayoritariamente pasobra tabata conveni pa neglisha e ley (di Ordenamento Teritorial) pasobra esey a habri caminda pa haci y deshaci den otorgamento di tereno. Ademas tabatin e sentimento cu ta trata di un ley cu e adversario politico a pone eynan ‘pa molestia’. E declaracion di ministro Schwengle di Salubridad Publico, cu e no lo otorga un permiso pa hotel den e caso concerni (Ocean Z) tabata bon noticia, pero su comentario cu mester ‘reactiva e ley di Ordenamento Teritorial’ tabata mas interesante ainda: cu danki na e ministro pa su sinceridad, esaki tabata e confirmacion cu e ley tabata ‘desactiva’.
Lastima pa gobierno, hues si ta di e pensamento cu ley desactiva ta ley ainda y como tal a dicta sentencia na varios ocasion contra gobierno, mas specificamente e ministro encarga cu Infrastructura. Den e ultimo caso di prohibicion di corte pa cambia destino di erfpacht, esun di Saliña Cerca, hues hasta a bay asina leu di tilda e gobernante di ta afecta raiznan di estado di derecho. Como cu hues atrobe no ta convenci cu esey lo impresiona e mandatario, el a impone den e caso aki tambe un multa te na un maximo di dies miyon florin.
Kico e caso aki ta ilustra, mescos cu esun di Ocean Z? Entre otro, cu apesar cu no necesariamente mester comparti opinion di e ministro di Turismo den tur sentido, mester reconoce cu e tin rason cu di e manera aki no por hiba un maneho strategico sano pa cu turismo, si su coleganan ta actua comosifuera nan ta biba riba un isla di nan mes. Ta p’esey tambe cu recientemente den e seccion aki a lansa e pensamento cu ta bira tempo pa legislacion nobo encuanto turismo. E sector aki simplemente a bira demasiado importante pa ta suheto na leynan asina deficiente manera awor. Mester regla e asunto aki, no solamente internamente, pero den un trabao visibel pa henter comunidad, di modernisacion di e cuadro legal pa e sector turistico, y su tras pa tur otro sector economico.
Si logra esaki, no a logra algo como gobierno y partido politico so, sino cu a logra algo di cual henter comunidad lo probecha. Pa e gobierno y partido en cuestion lo ta un bon manera pa gana algo di e confiansa bek cu a bay perdi den e ultimo periodo turbulento aki. Esey no ta tur, pues a keda ainda henter e problema di e presupuesto, cu sigur lo keda aproba pa un Parlamento cu un mayoria gubernamental obediente, pero e enfrentamento cu Hulanda den esaki ta na horizonte caba.
