Practicamente por bisa cu e bishita na Gobernador di ministro Oduber tabata pa entrega su retiro. Esey e ta bisa cu e palabranan cu su ‘decision ta definitivo’. Aunke el a condiciona esaki bisando cu si e no mira cierto cambio den su coleganan, e lo bay 1 di maart for di su puesto. Pero tur hende por comprende cu su coleganan lo no por hala atras sin perde cara, pues lo no cumpli cu su exigencianan. Cu e ‘move’ aki e ministro a crea pa su mes un espacio di casi dos luna pa caba di regla asunto pendiente den su ministerio. Su coleganan por evita esaki solamente dor di bay parlamento y laga e 13 ‘fielnan’ formula un mocion di desconfiansa pa destitui Oduber como ministro. Un paso cu ta bay hopi leu y talbes un caminda cu nan no kier subi pasobra por bin sali na cla cu nan no por conta cu tur 13 mas tampoco. Ta mucho tempran pa un ‘showdown’ asina pa midi cuanto ta keda y cuanto ta bay.
Pa Prome Ministro e problema ta grandi. E dificilmente por tuma e papel di mediador den e proceso aki, pasobra e mes ta e actor principal den e asunto, ya cu Oduber ta su rival interno principal. Varios luna pasa nos a raporta riba e problemanan cu a surgi ora cu e duo Mike & Mike ‘out of the blue’ a bin cu e idea pa acerca CITGO pa reapertura di e refineria, cu tabata practicamente caminda pa desmantelacion caba. Nan a mata dos parha cu un tiro, creando goodwill pa nan mes cerca esnan cu ta na fabor di habri e refineria, y a corta paso di ministro Oduber, cu tabata na punto di presenta un plan di desaroyo pa San Nicolas, cu tabata abarca un plan di reactivacion di e centro di San Nicolas. No mester ta di acuerdo cu tur detaye di su plan, ni tampoco cu su plan pa un hotel di casi mil camber na Sero Colorado, pero e tabatin e merito di tin un plan pa drecha San Nicolas, mientras cu su contrincantenan ta papiando solamente di habri e refineria. Y mester bisa cu tur honestidad cu drecha San Nicolas ta algo otro cu habri un refineria obsoleto. Aki por bisa cu Oduber a mustra mas ‘vision’ cu su colega mayor, cu di cada dies palabra cu e pronuncia tres ta ‘vision’ pero den practica no ta mira nada di esey.
A keda keto algun tempo pero e controversia a sigui y a bira tempo pa e fase final den e storia aki, cu bien nos por yame “Cronica di un salida anuncia”. E pregunta di algun aña atras caba tabata con e ambicionnan di Otmar Oduber lo bay cuadra cu e problema di semper, cu e simplemente no tin e fam corecto pa bira lider absoluto di partido AVP, y e mes tabatin experiencia di cerca kico a pasa cu su amigo Tico Croes, ora a sacrifica esaki como lider temporal, mientras tabata prepara e siguiente Eman pa tuma mando.
E momento aki ta parce e momento propicio pa Otmar Oduber tuma un decision y tin varios asunto cu na e momento aki ta hunga un papel. Den su entrevista dilanti oficina di Gobernador el a menciona e situacion pa cu husticia y financia publico. Pa loke ta husticia, su problemanan cu ministro Dowers ta conoci y Oduber tambe sa cu aki e ta tocando un punto unda hopi na Aruba, y tambe den su partido, ta comparti su critica. Encuanto e situacion financiero, el a declara cu e ta haya cu Aruba mester cumpli cu loke a palabra pa yega na e situacion desea, insinuando aki cu ta e otronan no tin pensa pa haci esaki. Awor, ta facil pa e bisa asina, pasobra e tin fondo den ATA por ehemplo, cu e por maneha na su antoho, criticando e otronan cu ta nan ta desperdiciando placa publico y no ta percura pa yega na un presupuesto balansa. Pero en todo caso aki tambe e ta toca un punto sensitivo pa e otronan, cu ta parce realmente di ta buscando un siguiente confrontacion cu Reino, en bes di percura pa e saneamento financiero tuma luga. Aki tambe Oduber ta referi na un asunto unda e ta uni su mes na un critica bastante generalisa den pueblo y cu hasta tin cierto apoyo den seno di su propio partido.
Pero tin mas asunto pa considera. Mirando e caso contra Roberto Rincón na Merca, y e problemanan cu por surgi di esaki pa gobierno di Aruba, specificamente pa esnan cu ta envolvi den e intento di reapertura di e refineria, awor ta e momento propicio pa distancia su mes di tur esaki. Kico por spera den e dianan nos dilanti? Negociacion di parti di Prome Ministro, cu sin embargo segun nos opinion no lo cambia e decision, y mas bien lo sirbi tambe pa Premier Eman gana poco tempo mientras ta considera e pasonan pa tuma como partido y como gobierno.
