Ministro Arends por cambia maneho di economia?
Desde algun siman nos tin un ministro nobo encarga cu asunto di economia y (tele)comunicacion. Esaki a tuma luga den e ‘reshuffle’ necesario despues cu ministro cu tabata encarga cu e.o. turismo a dicidi di bandona gobierno y partido. Mientras tanto ya e partido nobo a keda funda y ta bay haci su esfuerso pa convence pueblo cu nan a haci e escogencia corecto. Pero, con ta para cu gestion di e sectornan cu a keda reparti bao di e otro ministronan, y specialmente loke e ‘vakminister’ aki a haya: asunto economico y comunicacion, te na eleccion otro aña? Kico e lo por haci diferente den e tempo aki, o por ta cu el a haya e tarea pa no cambia nada, pero djis hunga ‘shopkeeper’ pa e periodo ey?
Nos por bisa cu el a cuminsa riba un bon pia, y esey ta e iniciativa pa trece un partner aden pa loke ta yama ‘micro-financing’. Esey a traves di e fundacion Hulandes Qredit, cu ta duna prestamo na iniciativa empresarial te cu 250.000 Euro. Y esaki sin e exigencianan normal di ‘collateral’ cu banconan comercial ta pone. Loke ta haci cu hopi iniciativa no por haya financiamento. E iniciativa di Qredits a surgi na Hulanda pasobra e banconan comercial mes tabata ripara cu tin cierto clientela cu nan no por yuda pero cu unabes riba pia, por ta nan cliente pa hopi aña despues. Empresario cu tabata exitoso cu prestamo chikito, por crece y bin banco pa un prestamo grandi. No ta caridad y pensamento noble a hiba na e iniciativa Hulandes aki, pero ‘espirito comercial saludabel’ (gezonde koopmansgeest) manera e Hulandesnan mes ta yama esaki.
E straño ta cu na Aruba e mesun pensamento strategico no a logra penetra cerca nos banconan comercial ainda. Y nos no ta mira algo asina bira realidad tampoco y pakico no? Por ta cu e banconan comercial ta comodo cu loke nan ta haci, prestamo pa cas y auto y pa comercio mas desaroya, cu por cumpli cdu un lista largo di condicion? Nan no ta preocupa pa esun cu ta chikito awe pero mañan por ta mas grandi y un bon cliente potencial?
Hopi a ser papia den ultimo añanan riba e tema aki, pero no tabata posibel pa bin cu un iniciativa di Aruba mes pa yena e bashi aki den loke mester ta idealmente un pakete di estimulo pa empresa mediano y priva. Ban spera cu banda di e proyecto nobo aki, cu capital Hulandes, nos por mira mas prueba di un maneho di incentivo pa empresa mediano y chikito, pasobra ta esey ta loke nos mester.
Pero tin mas cos den cual e ministro nobo por hunga un papel, esey si maneho di e gabinete permiti esey. Tin varios asunto cu por mehora sin cu necesariamente esey por bay costa voto na september 2017, al contrario. Manera un mehoracion den e proceso pa yega na permiso pa empresa, y e otro permisonan specifico cu mester, cu ta parce mas un tragedia cu otro cos. Y tambe acopla politica encuanto permiso na e ley di ordenamento teritorial, pa cuminsa trece orden den e anarkia actual. Y de paso bin cu un inspeccion riba empresa cu ta haci un trabao debido, ya cu pa varios aña caba e seccion di inspeccion di asunto economico ta un berguensa. Y den esaki nos no ta culpa e departamento mes, pero si e ministronan anterior cu a laga esaki bay completamente for di man.
Tin mas aspecto pa atende, aunke no ta nos intencion di ta completo aki. Por ehemplo, con ta para cu e politica encuanto apertura den telecomunicacion, pa crea un base mas amplio pa desaroyo actual y futuro den telecomunicacion? Laga nos pone e asunto bon cla: legalmente ta imposibel pa sigui defende un monopolio di Setar riba tereno di telecomunicacion. E sector a habri caba pa actornan comercial unda dificilmente por bisa cu nan manera di opera ta motibo pa sigui corta nan caminda mas tanto posibel.
Nos ta ripiti loke nos a trece dilanti recientemente: bo no por ta boga como gobierno cu bo kier un economia basa riba conocemento (‘kenniseconomie’), anto di otro banda direccion di Telecomunicacion, y e ministronan cu a carga responsabilidad pa e cartera aki den ultimo añanan, no a haci nada otro cu pone mas trabao posibel pa tur esunnan cu tabata dispuesto di pone nan placa, no esun di pueblo, na riesgo pa inverti den un miho infrastructura digital pa Aruba.
Pregunta concreto na e ministro: ta tur hende te awe mester hiba gobierno corte, den cada caso individual, pa nan por haya e permisonan necesario? Pregunta concreto na e ministro actual: ta bin un maneho mas sensato pa cu telecomunicacion, o nos mester saca e conclusion cu e ministro actual solamente mag ‘tene e tienda nechi’ te na eleccion otro aña? Kico ta e mandato cu e tin?
Nos no mester un contesta di inmediato. Si e no ta duna claridad den e aña nos dilanti, anto esey riba su mes tambe ta duna mas cu suficiente claridad. Nos ta keda pendiente.
