Den un carta reciente na tur directiva di entidad (schoolbestuur) cu ta opera den enseñansa, na nomber di ministro encarga cu enseñansa, director di departamento di enseñansa, Sra. Proveyer-Groot, a anuncia cu ta bay implementa e plan ministerial pa elimina e fenomeno di mucha cu ta obliga di haci un cierto aña di scol dos biaha: ‘keda sinta’ o na Hulandes ‘bijven zitten’.

Esaki lo mester implementa dentro di e aña escolar aki caba, implicando cu pa fin di e aña escolar aki no lo tin mucha mas cu mester keda sinta. Esaki no ta conta pa mucha cu lo o tabatin un ausencia largo pa enfermedad. Segun e carta ta bisa, “no lo tin ‘bespreking’ mas anto di e alumnonan.” Tur vak y modulo pa cual a haya 5.5 o mas no mester haci mas. E departamento encarga, Directie Onderwijs y Inspectie Onderwijs a haya e instruccion pa implementa e plan na un manera responsable, segun e carta. Tambe cu ya tabatin entrevista cu directiva di e entidadnan, cu cabesante di scol y cu sindicato Simar.

E carta a bay acompaña di un resumen di kico por haci pa por cumpli cu e tarea pa elimina dicho fenomeno dentro di un aña. Den e introduccion ta recorda cu keda sinta realmente ta ‘not done’. Den hopi pais e no ta e sistema cu ta aplica, salvo caso di ausencia durante gran parti di aña pa enfermedad, manera menciona caba.

Inmediatamente despues e documento ta toca un punto importante. Ta señala cu si e scolnan no ta percura pa ‘dossier’ (file) solido di cada alumno ta bira dificil pa evalua pakico un mucha ta ‘bay over’ y e otro ta keda sinta. “P’esey ta asina importante pa traha un bon dossier di cada alumno.” (No ta toca e punto si actualmente na nos scolnan ta existi e practica di traha bon dossier di cada alumno; red.).

Tambe ta señala cu datonan di nos enseñansa ta indica cu cos no ta bay bon cu nos enseñansa y cu ciencia ta mustra cu mayoria di mucha no tin ningun probecho di keda sinta y cu por lo tanto ta importante pa preveni keda sinta.

Segun e carta talvez nos sistema di enseñansa no por ofrece loke e alumno individual mester pero por haci hopi mas pa mehora calidad di enseñansa y preveni keda sinta.

Seguidamente ta discuti e propuestanan pa atende alumnonan cu atraso durante e aña escolar. E sugerencianan lo ta basa riba den practica diario ta haciendo caba na algun scol y ta producto di e discusionnan tocante e tema aki cu schoolbestuur, cabesante, Inspectie y Directie Onderwijs.

Mester cuminsa cu percura pa un oferta di bon enseñansa na scol y percura pa lo menos posible les cu no ta tuma lugar. Gerencia di un scol mester bay den e lesnan tambe pa aporta na calidad di e lesnan. Tambe mester evalua despues di e prome rapport caba unda e problemanan ta pa ofrece e alumnonan aki un trayecto alternativo cu ta brinda perspectiva pa mehoracion. Un sistema pa sigui tur alumno (volgsysteem), di papel o digital tambe mester ser crea. Mester bin un asina yama ‘zorgcoordinator’ pa asisti den e consultanan y yuda busca solucion.

Ta sugeri tambe traha convenio di estudio (‘leerovereenkomsten’) cu alumno cu no ta motiva pa studia. Mester sugeri por ehemplo pa baha di nivel, di VWO pa Havo, di Havo pa Mavo, di Mavo pa EPB, etc. Esaki sinembargo solamente si no tin otro alternativa.

Ta duna atencion na introduccion di medionan digital pa amplia e posibilidadnan cu tin pa mehora enseñansa. Scolnan mester haya espacio tambe pa cambia enseñansa di tal forma cu keda sinta ta keda elimina.

Nota di redaccion:
Esaki ta solamente algun punto cu ta bin dilanti den e documento referi. Pa e documento completo por consulta nos website, o bay riba nos pagina di Facebook of click e link aki: https://drive.google.com/file/d/1e63zGzfQ6FlXCxRHth5Eq2wTMgCfxCAg/view?usp=sharing