Den entrevista cu e programa noticiero ayera merdia na Power FM 101.7 ministro encarga cu enseñansa, dr. Rudy Lampe, tabata contesta varios inquietud cu a surgi a base di e perspectivanan di habri scol proximamente, y tambe ki efecto e perdida di tanto tempo di scol lo por significa pa e alumno den futuro.
Un preocupacion importante, tambe deposita pa varios mayor cerca redaccion di Bon Dia Aruba, ta con ta bay sigui, specialmente mirando e retraso adquiri a traves di varios luna di no a haya materia nobo, ya cu e scolnan y maestronan tabata manda solamente materia pa ripiti. En todo caso, esey ta e comentario cu nos redaccion a ricibi di varios mayor.
Specialmente ta reina e temor cu e retraso aki por resulta negativo pa alumno actualmente den klas 5 di scol basico, cu por haya nan mes confronta cu un resultado menos bon den e toets final, cu un recomendacion mas abao cu mayor y alumno lo a aspira.
Pa sorpresa di varios e mandatario a declara cu e no ta mira e problema si un mucha haya recomendacion pa bay EPB envez di Mavo, y cu e tin hasta pensa pa haci e toets obligatorio pa dicidi ki tipo di scol e alumno por sigui despues, tambe pa e scolnan cu no ta publico. Manera tabata di spera, a bin reaccion atrobe di varios mayor preocupa, cu ta comenta entre otro cu nan a spera un contesta riba con ta bay yuda e alumnonan afecta mas tanto posible pa otro aña nan por deshaci lo mihor posible di e efectonan di e periodo actual di inactividad. Sin embargo, cu e ultimo expresion aki ta parce cu e enfasis ministerial no ta riba remedia mas tanto posible e situacion di crisis actual den e tempo nos dilanti, sino cu ta enfoca riba formalisa algo cu por bira altamente conflictivo y contraproducente.
Un toets cu ta decisivo y obligatorio por bira un problema pa alumnonan cu tin problema cu haci e tipo di test aki, mientras por bien ta cu por lo demas nan resultadonan escolar durante aña ta satisfactorio. Ta p’esey ta duna peso tambe na e resultadonan escolar regular.
