Den rueda di prensa diahuebs atardi ministro encarga cu Asunto Social y Labor, Glenbert Croes, a duna un update di e proyectonan di ayudo di emergencia den cuadro di e crisis di coronavirus.

El a recorda cu ta casi 3 luna pasa cu e crisis a cuminsa dia 13 di maart cu deteccion di e promer caso di e virus na Aruba, cu tabatin consecuencia severo pa Aruba. Practicamente inmediatamente a cuminsa cu e proyecto FASE (Fondo di Asistencia di Solidaridad di Emergencia).

E proyecto cu a cuminsa cu casi nada, segun e ministro, y den tres luna a haci cambio y a adapta y a suavisa e criterio y requisitonan pa acomoda mas tanto hende posible. Un ayudo cu a cuminsa di practicamente nada pa despues haya forma te loke FASE ta awor. Den cuadro di e proyecto aki a registra algo mas di 16.000 persona, di cual alrededor di 3.000 tabata empresario chikito sin personal (‘Zelfstandige Zonder Personeel’; ZZP-er). Ministro Croes a enfatisa cu no ta existi un ‘lista negativo’ di esnan cu lo a haya nan peticion nenga, pasobra ta reevalua tur solicitud. El a comenta di a tende cu lider di e partido opositor ta dispone un lista asina y lo ta bishitando cas di e hendenan ey, loke segun e ministro anto no ta posible.

Durante rueda di prensa Minister Glenbert Croes a duna un presentacion di e cifranan principal. Manera e mandatario a bisa, tabatin 13.093 solicitud di cual ainda tin 1.851 entrega incompleto cu por procesa ainda. Un total di 1.932 a solicita dos biaha of mas. Entre luna di april y juni un total di 11.700 pago a keda efectua. Mas o menos 6.000 hende cu inicialmente a haya FASE, a pasa pa e programa di Subsidio di Salario.

Te cu ayera a paga Afl. 11.089.694 miyon na FASE cual pago ta ser efectua pa Directie Financiën despues di pasa su control estricto y riguroso. Sin embargo tin cierto pago ta bay cash pa esnan cu no tin un cuenta bancario, loke ta den man di Departamento di Asunto Social.

Pa loke ta trata FASE/ZZP – comerciante independiente sin empleado, den e sector aki a conoce un total di 2.955 solicitud di cual 858 tabata doble y 1.460 tabata incompleto. E mandatario a haci un suplica na esnan cu ta pidi ayudo pa cumpli cu e requisitonan pa por yuda nan lo antes posible.

Minister Glenbert Croes a termina haciendo un apelacion firme riba tur hende pa no kere cu ya a vence e crisis. “Ainda tur hotel ta cera y ainda mayoria di restaurant ta cera y hopi otro negoshi tambe. Ainda tin hopi negoshi cu ta cera. Esunnan cu a habri mes, no ta draai manera antes mas pasobra e cantidad di hendenan cu tin un entrada ta hopi menos cu prome cu e crisis. Y esunnan cu ainda tin entrada ta ganando menos cu anteriormente. Pues Aruba ta den crisis y nos pueblo mester di un consciencia nobo pa hunto nos sobrepasa e temporada dificil cu nos ta bibando. Ban pone nos miho pasionnan hunto pa crea e Aruba nobo.”

Desempleo

Ministro Croes a amplia tambe riba e tema cu a surgi ultimo dianan encuanto e cifra corecto di desempleo actualmente. El a revela cu ta su persona mes a suministra lider di delegacion di Aruba e cifranan pa e conferencia di IPKO (encuentro entre parlamentonan di Reino) cu ta e tan discuti cifra di 77% di desempleo. For di su splicacion ta sali afor cu esaki lo tabata e desempleo cu Aruba lo a conoce si no a haci e esfuerzonan hunto cu Hulanda pa mantene parti di e forza laboral na trabao. Esaki segun e mandatario a base di e cifranan suministra pa CBS y SVb, cu ta varia un poco di otro pero ta alrededor di e cifra menciona.

Nota di redaccion:

For di despacho di ministro Glenbert Croes Bon Dia Aruba a ricibi un documento di Departamento di Labor den cual ta notifica cu e calculacion di CBS no ta cuadra cu e definicion di desempleo (actual). Lo mester verifica ainda cu e datonan di e subsidio di salario y di FASE pa por duna un cifra real di e actual desempleo.

Sin embargo, ta keda e punto cu esaki ta cu e cifra maneha di 73 – 77% ta un calculacion di posible desempleo, mientras cu cifra di desempleo ta trata semper e cifra real di esnan berdaderamente desemplea na cierto momento.