Nos ministro encarga cu turismo ta rabia (atrobe). Segun AHATA e ta mete demasiado den Aruba Tourism Authority (ATA). Segun e ministro esey ta gañamento, e no ta mete indebidamente den e organismo encarga cu implementacion di maneho di turismo. Nos ta bisa cu enfasis ‘implementacion’, pasobra oficialmente (pa ley) ATA no ta encarga cu desaroyo di maneho riba tereno di turismo, pero ta simplemente sigui e maneho di e ministro den e puesto na e momento ey. E ley ta bisa textualmente den articulo 2, inciso 1:“ Tin un institucion cu tin como meta e implementacion di e maneho di e Ministro pa fomenta turismo dentro, desde y for di Aruba, y cu ta participa na trafico legal bao di e nomber Aruba Tourism Authority, abrevia como A.T.A. “. Tur cos mas cu e organisacion aki ta haci, ta deriva di e meta principal aki.
Anto nos no ta comprende e rabia di e ministro, pasobra metiendo den asunto di ATA, e ta haciendo exactamente loke ley ta bisa. Ademas, e ley aki, no ta e baby cu e mes a para na su cuna? No ta e mes a traha e structura aki, anto awor e kier pasa pa santo, cu e ta mantene su debido distancia y no ta mete den e asuntonan di ATA? Ta ken ta bay kere e cos aki? Nos por conta hasta mas cu tambe ta bin di e texto di ley bao di cual e organisacion ta funciona. Den articulo 20, inciso 1 e ley ta bisa:” E Ministro por duna e Director instruccion tocante e implementacion di e tareanan encomenda na e Persona Huridico. E Director ta duna siguimento na un tal instruccion dentro di e termino stipula pa e Ministro.
Ta asina si cu e ministro, prome cu e duna e instruccion, mester consulta cu e Hunta di Supervision. E Hunta ta duna su conseho mas pronto posibel, e pro pa mas tarda dentro di dos siman. E decision di no sigui e conseho aki mester ta motiva. Esaki ta significa cu e ministro ta cuminsa cu stipula pa ATA ki maneho e kier mira implementa, y despues ta dirigi trabao di e director tambe dunando instruccion, tur segun e modelo cu e mes a instrui huristanan na Departamento di Legislacion pa traha pe. Naturalmente cu e ley aki no a pasa sin critica di Conseho Consultativo, cu debidamente a indica e punto cu ATA den concepto ta un organismo autonomo, es decir pa crea mas distancia entre mandatario y organismo, pero cu manera a hinca e asunto aki den otro no a keda nada di e supuesto autonomia cu e mester tin.
Talbes asina nos por cuminsa comprende tambe e critica di e miembronan recomenda pa AHATA, cu ta parce cu nunca nan a lesa e version original na Hulandes di e ley aki. Si nan no tin esey ainda, lo ta bale la pena duna nan un traduccion na Ingles. Pero por ta cu su rabia tabatin mas di haci cu e cifranan cu AHATA a divulga tocante e sumanan grandi cu a bay pa gobernacion pasobra no a logra gasta nan… Esey si ta algo nobo na Aruba, un ministro cu no ta logra gasta tur su placa! Con nos mester husga esaki, como algo bon o algo malo? Esey ta depende na kico e kier gasta e placa. Si ta na mas mercadeo mester a gasta esaki, por ta cu esey ta hustifica. Si ta pa contrata mas personal y haci mas cos di luho na Aruba, podise no. Pero esey ta dificil pa husga, pasobra manera ta e caso cu casi tur entidad liga na gobierno, nos como ciudadano no mag haya sa kico nan ta haci cu placa.
Pero tin otro aspecto preocupante den e asunto aki. Esey ta cu nos ta cuminsa perde bista den ki ministerio ta haci kico. A raiz di e ultimo atraconan den vecindario di e hotelnan a cuminsa atrobe discusion tocante e sumanan cu ta disponibel pa stimula siguridad den e area unda turismo ta concentra. Segun declaracion di e directora di ATA, tin placa disponibel, pero falta e plan pa inverti esaki. Awel, awor cos a caba di bruha. Nos ta biba den un pais unda Husticia, cu ta responsabel pa siguridad, no tin placa pa actua, y otro caminda miyones di placa di Aruba (di nos!) ta warda decision di otro hende cu no sa unda nan cara para ora ta trata siguridad publico.
Pa colmo aki ta desvia decision di fondonan publico for di parlamento, cu mester ta esun cu ta dicidi riba placa publico. Ta dificil pa gobernacion sigui deteriora y desintegra di e manera aki, anto henter Aruba ta para wak con insiguridad y delincuencia, importa y crioyo, tin nos den su gara. Nos no ta keda sin critica nos ministro di Husticia ora nos ta kere cu esey ta na su luga, pero loke ta pasando awor ta loke bo ta haya ora cu ta desvia fondo for di e medionan general di gobierno, di tal manera cu ni e ministro, ni parlamento tin algo di bisa riba e fondonan ey. Te ki dia, te ki dia.
