Ta bay concentra riba e islanan

Hulanda ta parce serio den e asunto di pone e tema integridad halto riba agenda den e trato cu e islanan den Caribe. Mientras den e coalicion anterior tabatin un ministro encarga cu Asuntonan Interior y di Reino, den e gabinete cu dentro di poco lo asumi responsabilidad tin un ministro designa, Kajsa Ollongren di D’66, cu e cartera di asunto di Reino so. Varios motibo na practicamente tur e islanan ta hunga un papel. Siman pasa tabatin por ehemplo e caso di e politico Clyde van Putten di St. Eustatius cu a menasa di mata y kima e militarnan Hulandes, si nan yega su isla. Aparte cu un expresion asina ta completamente inaceptabel y ta di spera cu e señor aki haya su merecido pa e comprende su luga, algo asina ta ilustra e ambiente actual, mescos e situacion actual na St. Maarten.

E diferente problemanan cu tin na diferente isla tin en comun cu e autoridad cu mester actua den cierto caso ta na nivel di Reino, o Hulanda, den caso di e islanan BES. Y den hopi caso ta nos mes politiconan ta asumi e papel di victima di recolonisacion, supuestamente ehecuta den nan vision pa Den Haag, mientras cu nan no kier mira e desorden cu nan mes ta ocasiona, cu ta haci necesario cu na nivel di Reino mester tuma paso pa mantene orden.  No ta nada straño cu e expresionnan idiota di sr. Van Putten a tuma luga den un simposio na Curaçao, unda esunnan cu ta denuncia e metemento di Hulanda den nan asuntonan interno a reuni.

Ta bon pa remarca di biaha cu na Aruba nos tin un otro situacion y un otro ambiente. Esunnan cu a pretende cu nan ta desafia e autoridad di Reino, despues cu nan mes a pega e barco (financiero) y a kere cu welga di hamber ta resolve problema, a haya nan mal sirbi pasobra no tabatin apoyo pa e tipo di payasada aki y awe nan ta saliendo di poder ehecutivo. Por lo menos nos por bisa cu un gran mayoria di e pueblo aki sa masha bon kico ta e beneficio di ta pertenece na Reino Hulandes y por lo tanto ta acepta ora cu awa pasa hariña y Den Haag mester bula aden pa coregi cos cu a bay robes, pasobra parti di nos politiconan ta pretende cu e palabra autonomo ta igual na independiente.

Ta p’esey tambe no ta mas cu logico cu e tres partidonan cu diamars a firma un acuerdo pa bay goberna hunto den un coalicion, tambe ta menciona cu e tema integridad y bon gobernacion ta halto riba nan agenda. No cabe duda cu via gobernador nan ta na altura di e pasonan cu gobierno di Hulanda (y Reino) lo kier bay tuma den e periodo di gobernacion venidero na Hulanda, cu ta coincidi cu esun di nos. Y nos no tin ningun duda cu nan mes a comprende caba, no di Hulanda, sino contemplando e situacion cu nan tin nan dilanti na Aruba, cu nan ta esunnan yama pa asumi responsabilidad gubernamental y cuminsa pone cosnan straight cu tin hopi aña ta bayendo den mal direccion. Dos punto cardinal tin den esaki y nos ta mas cu logico cu den e acuerdo nan ta haya prioridad: integridad y tur loke esaki ta trece cu ne den combati corupcion den gobernacion; y e buskeda di yega na financia publico sano, loke na e momento aki ta mustra un tarea monstruoso pa asumi. Pero esey ta parti di politica tambe: loke bo bin topa, loke bo adversario a laga atras, esey ta loke abo lo mester lidia cu ne.

Y como gobierno cu no a ni sinta ainda, ya caba bo ta cuminsa haya e situacionnan cu bo mester enfrenta. Manera e caso di e abogadonan, cu awor ta haya cu ta basta cu e acuerdo tocante nan pago cu mester a mehora basta tempo pasa caba, pero gobierno saliente no a regla esaki. Di tur e tempo ey nos no a tende nada di e abogadonan, pero diripiente nan t’ey pa confronta esunnan cu, si tur cos bay bon, lo asumi responsabilidad gubernamental aki un par di siman, cu nan exigencianan, riba nan mes hustifica. Esaki lo no ta e unico sorpresa, si nos por yam’e asina. Tin hopi mas pa bini, pasobra ta masha hopi asunto a keda benta, y e tres partidonan sa esey pasobra no ta nan mes a critica un gobierno cu tabata all show, no go?  No ta keda nada otro cu mantene calma y haci loke mester haci.

Pa loke ta Hulanda su deseo den e periodo nos dilanti, gobierno nobo lo mester sinta na mesa cu mente habri y yega na acuerdo pa loke ta e asuntonan den cual nan por yuda nos. No ta cuestion di acepta sin mas loke nan ta pretende, pero si teniendo na cuenta cu tin hopi cos cu nos por beneficia trahando hunto, sigur por ehemplo riba tereno di mehoracion di e aparato gubernamental. Mientras na e otro islanan tin hende ta perde nan tempo cu nan lucha anti-colonial ta importante pa nos sigui reconoce cu ta 2017.